Gujarat Weather News: વેસ્ટર્ન ડિસ્ટર્બન્સને પગલે રાજ્યમાં ઠંડી અને વરસાદની હવામાન વિભાગે કરી આગાહી

Gujarat Weather News: ગુજરાતમાં શિયાળો હવે ધીમે ધીમે વિદાય તરફ છે, પરંતુ તે પહેલાં હવામાનમાં ફરી એકવાર મોટો પલટો આવવાની શક્યતા છે. ભારતીય હવામાન વિભાગ (IMD) ની નવી આગાહી મુજબ, ઉત્તર ભારતમાં સક્રિય થયેલા બે બેક-ટુ-બેક વેસ્ટર્ન ડિસ્ટર્બન્સને કારણે ગુજરાત સહિત દેશના અનેક ભાગોમાં વાતાવરણ બદલાશે.

હિમાલયમાં હિમવર્ષા અને મેદાની રાજ્યોમાં વરસાદ

હવામાન વિભાગના જણાવ્યા અનુસાર, પશ્ચિમી વિક્ષેપ (Western Disturbance) સક્રિય થવાને કારણે જમ્મુ-કાશ્મીર, લદ્દાખ અને હિમાચલ પ્રદેશમાં ભારે હિમવર્ષા થવાની સંભાવના છે. તેની અસરથી મેદાની વિસ્તારો જેવા કે પંજાબ, હરિયાણા, રાજસ્થાન અને દિલ્હીમાં ગાજવીજ સાથે વરસાદ પડી શકે છે. 13 ફેબ્રુઆરી અને ત્યારબાદ 16-17 ફેબ્રુઆરીએ આ સિસ્ટમ વધુ મજબૂત બનશે.

ગુજરાત પર શું થશે અસર?

ગુજરાતના સંદર્ભમાં હવામાન વિભાગે મહત્વની વિગતો આપી છે:

• તાપમાનમાં ઘટાડો: ઉત્તર ભારતમાં થનારી હિમવર્ષાને કારણે ઠંડા પવનો ફૂંકાશે, જેના લીધે સૌરાષ્ટ્ર અને કચ્છ સહિત સમગ્ર ગુજરાતમાં લઘુત્તમ તાપમાન ગગડી શકે છે.
• ઠંડીનું મોજું: શિયાળાની વિદાય પહેલા ફરી એકવાર રાજ્યમાં ઠંડીનો ચમકારો અનુભવાશે.
• વરસાદની શક્યતા: હાલમાં ગુજરાતમાં સીધા વરસાદની શક્યતા ઓછી છે, પરંતુ ઉત્તર-પૂર્વના પવનોને કારણે વાતાવરણમાં ભેજ અને ઠંડક વધશે.
• 14 ફેબ્રુઆરી સુધીની સ્થિતિ: આગામી 14 ફેબ્રુઆરી સુધી તાપમાનમાં કોઈ મોટો ફેરફાર જોવા નહીં મળે, પરંતુ ત્યારબાદ પારો નીચે ઉતરી શકે છે.

તબીબોની સાવચેતી રાખવા સલાહ

વાતાવરણમાં આવતા આ અચાનક બદલાવને કારણે 'મિક્સ સીઝન' જેવી સ્થિતિ સર્જાશે. વહેલી સવારે ઠંડી અને બપોરે તાપને કારણે વાયરલ ઇન્ફેક્શન અને શરદી-ખાંસીના કેસો વધી શકે છે. આથી, તબીબોએ બાળકો અને વૃદ્ધોને ખાસ સાવધ રહેવા અને સ્વાસ્થ્યનું ધ્યાન રાખવા સૂચના આપી છે.

આગામી 5 દિવસનું હવામાન

ઉત્તર પ્રદેશ, મધ્ય પ્રદેશ અને બિહાર જેવા રાજ્યોમાં સવારના સમયે ગાઢ ધુમ્મસ જોવા મળશે. જ્યારે પંજાબ અને હરિયાણામાં 16-17 ફેબ્રુઆરીએ હળવો વરસાદ થવાથી ફરીથી તાપમાનમાં 2-3 ડિગ્રીનો ઘટાડો નોંધાઈ શકે છે, જેની સીધી અસર ઠંડક તરીકે ગુજરાત સુધી પહોંચશે.

English summary

IMD Gujarat Alert: Two Western Disturbances to trigger cold winds and light rain in North India, impacting Gujarat's temperature.