દિલ્હી એરપોર્ટ પર ઈબોલા વાયરસને લઈને એલર્ટ, DGHS એ જાહેર કરી ગાઈડલાઈન, કોના-કોના પર રખાશે નજર?
ઇબોલા વાયરસના વૈશ્વિક પ્રકોપને કારણે ભારત સરકાર સંપૂર્ણપણે સતર્ક બની છે. વિશ્વ સ્વાસ્થ્ય સંગઠન (WHO) દ્વારા ઇબોલાને 'પબ્લિક હેલ્થ ઇમરજન્સી' જાહેર કરાયા બાદ, દિલ્હીના ઇન્દિરા ગાંધી ઇન્ટરનેશનલ (IGI) એરપોર્ટ પર એક મહત્ત્વપૂર્ણ સ્વાસ્થ્ય એડવાઇઝરી જારી કરાઇ છે. આનો મુખ્ય હેતુ પ્રભાવિત દેશોમાંથી આવતા પ્રવાસીઓ પર સઘન નજર રાખી, વાયરસને ભારતીય સીમામાં પ્રવેશતો અટકાવવાનો છે.
કેન્દ્રીય સ્વાસ્થ્ય મંત્રાલય હેઠળના મહાનિદેશાલય સ્વાસ્થ્ય સેવા (DGHS) એ આ કડક માર્ગદર્શિકા બહાર પાડી છે. તેમાં ડેમોક્રેટિક રિપબ્લિક ઓફ કોંગો, યુગાન્ડા અને દક્ષિણ સુડાન જેવા ઇબોલા પ્રભાવિત દેશોના મુસાફરોને વિશેષ સતર્કતા રાખવા જણાવાયું છે.
જો કોઈ મુસાફરને તાવ, ઉલટી, ઝાડા, માથાનો દુખાવો, માંસપેશીઓમાં દુખાવો, નબળાઈ, ગળામાં દુખાવો કે શરીરમાંથી અકારણ રક્તસ્રાવ જેવા લક્ષણો જણાય, તો ઇમિગ્રેશન ક્લીયરન્સ પહેલાં એરપોર્ટ હેલ્થ ઓફિસર કે હેલ્થ ડેસ્કને તાત્કાલિક જાણ કરવી ફરજિયાત છે.
શંકાસ્પદ કે પુષ્ટિ થયેલા ઇબોલા દર્દીના લોહી કે શારીરિક પ્રવાહીના સંપર્કમાં આવેલા પ્રવાસીઓએ તાત્કાલિક સ્ક્રીનિંગ કરાવવી. ભારત આવ્યાના ૨૧ દિવસની અંદર ઇબોલાના લક્ષણો દેખાય તો ડોક્ટરનો સંપર્ક કરી ટ્રાવેલ હિસ્ટ્રી જણાવવી અનિવાર્ય છે.
WHO એ વૈશ્વિક સ્તરે ઇબોલા કેસો અને મૃત્યુમાં વધારાની ચેતવણી આપી છે. ભારતમાં હજુ એક પણ કેસ નોંધાયો નથી. કેન્દ્રીય સ્વાસ્થ્ય મંત્રાલયે આ પગલાં માત્ર સાવચેતીના ભાગરૂપે દેશને સુરક્ષિત રાખવા માટે હોવાનું સ્પષ્ટ કર્યું છે, જેથી નાગરિકોને ગભરાવાની જરૂર નથી.
ઇબોલા વાયરસ ડિસીઝ (EVD) સામેની તૈયારીઓની સમીક્ષા માટે કેન્દ્રીય સ્વાસ્થ્ય સચિવ પુણ્ય સલિલા શ્રીવાસ્તવની અધ્યક્ષતામાં ઉચ્ચ-સ્તરીય બેઠક યોજાઈ. જેમાં તમામ રાજ્યો અને કેન્દ્રશાસિત પ્રદેશોને દરેક સ્તરે સજ્જ રહેવા સલાહ અપાઈ છે. વિસ્તૃત SOP માં પ્રવાસીઓની પ્રી-અરાઇવલ અને પોસ્ટ-અરાઇવલ સ્ક્રીનિંગ, ક્વોરન્ટાઇન, કેસ મેનેજમેન્ટ અને લેબ ટેસ્ટિંગના કડક નિયમો શામેલ છે.
અધિકારીઓએ જણાવ્યું કે ભારત પાસે ૨૦૧૪ માં આફ્રિકા ઇબોલા પ્રકોપનો સામનો કરવાનો સફળ અનુભવ છે. તે સમયે પણ ભારતે આવા જ સાવચેતીભર્યા પગલાં લઈ દેશને સુરક્ષિત રાખ્યો હતો. સરકારે નાગરિકોને સત્તાવાર સલાહ પર જ ભરોસો કરવાની અપીલ કરી છે.
WHO ના વડા ડો. ટેડ્રોસ અધાનમ ગેબ્રેયેસસ (Dr. Tedros Adhanom Ghebreyesus) અનુસાર, ઇબોલાની 'બુંડીબુગ્યો' (Bundibugyo) પ્રજાતિનો પ્રકોપ લગભગ બે મહિના પહેલા શરૂ થયો, જે ઝડપથી ફેલાઈ રહ્યો છે. વૈશ્વિક સ્તરે કુલ ૬૦૦ શંકાસ્પદ કેસ અને ૧૩૯ મૃત્યુ નોંધાયા છે; જ્યારે કોંગોમાં ૫૧ અને યુગાન્ડામાં ૦૨ કેસ પુષ્ટિ થયેલા છે.
આ ગંભીર આંકડાને જોતા ભારત સરકારે પોતાની સર્વેલન્સ અને એરપોર્ટ સુરક્ષા વ્યવસ્થા સમયસર વધુ મજબૂત કરી છે, જેથી સંભવિત ખતરાને ટાળી શકાય.
Click it and Unblock the Notifications
Sign in with Google
