Diwali 2025 : ગુજરાતમાં વરસાદ દિવાળી બગાડશે? જાણો હવામાન વિભાગની આગાહી

By Desk

Published: Monday, October 13, 2025, 16:35 [IST]

Diwali 2025 : નવરાત્રીની મજા બગાડ્યા બાદ ફરી એકવાર વરસાદ દિવાળીના તહેવારની ખુશી પર પણ પાણી ફેરવી શકે છે. ગુજરાતમાંથી નૈઋત્યનું ચોમાસું વિદાય લઈ ચૂક્યું છે છતાં ભારતીય હવામાન વિભાગે વરસાદની આગાહી આપી છે.

લેટેસ્ટ આગાહી અનુસાર, દિવાળીના તહેવારોની શરૂઆત ધનતેરસ (18 ઑક્ટોબર)થી થઈ રહી છે તે દરમિયાન એટલે કે 16 થી 19 ઑક્ટોબર દરમિયાન દક્ષિણ ગુજરાતના કેટલાક જિલ્લાઓમાં હળવા વરસાદની આગાહી વ્યક્ત કરવામાં આવી છે.

હવામાન વિભાગના બુલેટિન મુજબ, 15 ઑક્ટોબર સુધી રાજ્યના તમામ જિલ્લાઓમાં હવામાન સૂકું રહેવાની સંભાવના છે. જો કે, 16 ઑક્ટોબરથી પરિસ્થિતિ બદલાઈ શકે છે:
દક્ષિણ ગુજરાતના જિલ્લાઓ ડાંગ, તાપી, નવસારી, વલસાડ, તેમજ દમણ અને દાદરા નગર હવેલીમાં છૂટાછવાયા સ્થળોએ હળવોથી મધ્યમ વરસાદ અથવા ગાજવીજ સાથે વરસાદ પડવાની શક્યતા છે. રાજ્યના બાકીના વિસ્તારોમાં હવામાન સૂકું રહેશે.

17 થી 19 ઑક્ટોબર દરમિયાન સૌરાષ્ટ્રના જિલ્લાઓ અમરેલી, ભાવનગર, ગીર સોમનાથ અને દીવમાં છૂટાછવાયા સ્થળોએ હળવાથી મધ્યમ વરસાદ અથવા ગાજવીજ સાથે વરસાદ થવાની પ્રબળ શક્યતા છે.

આ ઉપરાંત, દક્ષિણ ગુજરાતના ડાંગ, તાપી, નવસારી, વલસાડ તેમજ દમણ અને દાદરા નગર હવેલીમાં પણ છૂટાછવાયા વરસાદની આગાહી યથાવત્ છે. રાજ્યના બાકીના જિલ્લાઓમાં હવામાન સૂકું રહેશે.

ધનતેરસ, કાળી ચૌદસ અને લક્ષ્મી પૂજન જેવા મહત્ત્વના દિવસો દરમિયાન દક્ષિણ ગુજરાત અને સૌરાષ્ટ્રના દરિયાકાંઠાના વિસ્તારોના તહેવારી માહોલમાં વરસાદ વિઘ્ન લાવી શકે છે.

Published On October 13, 2025