દક્ષિણ ગુજરાતમાં 3 દિવસ માવઠાની આગાહી, જાણો કયા જિલ્લામાં વરસાદનું જોર વધારે રહેશે?

ગુજરાતમાં દિવાળીના તહેવારની શરૂઆત વચ્ચે હવામાન વિભાગે દક્ષિણ ગુજરાતના કેટલાક જિલ્લાઓ માટે વરસાદની આગાહી કરી છે.

20 ઓક્ટોબરથી શરૂ કરીને 22 ઓક્ટોબર સુધી, દક્ષિણ ગુજરાતના વિવિધ વિસ્તારોમાં હળવાથી મધ્યમ વરસાદ એટલે કે માવઠું પડવાની સંભાવના વ્યક્ત કરવામાં આવી છે.

હવામાન વિભાગના જણાવ્યા અનુસાર, 20 ઓક્ટોબરે સુરત, તાપી, નવસારી, ડાંગ અને વલસાડ જિલ્લાના છૂટાછવાયા સ્થળોએ હળવો વરસાદ થઈ શકે છે.

21 ઓક્ટોબરે મંગળવારે, દિવાળીના મુખ્ય દિવસે, દક્ષિણ ગુજરાતના નવસારી, ડાંગ અને વલસાડ જિલ્લાઓમાં તેમજ કેન્દ્રશાસિત પ્રદેશો દમણ અને દાદરા નગર હવેલીમાં હળવાથી મધ્યમ વરસાદ પડવાની શક્યતા છે. તહેવારના દિવસે વરસાદના કારણે લક્ષ્મી પૂજન અને ફટાકડાની મજા બગડી શકે છે.

22 ઓક્ટોબરે બુધવારે પણ નવસારી, ડાંગ અને વલસાડ જિલ્લામાં હળવા વરસાદની આગાહી છે.

દક્ષિણ ગુજરાત સિવાય રાજ્યના અન્ય ભાગો અમદાવાદ અને તેની આસપાસના વિસ્તારોમાં વાદળછાયું રહેવાની આગાહી છે. આ વાદળછાયા વાતાવરણના કારણે સામાન્ય તાપમાનમાં ઘટાડો અનુભવાશે અને વહેલી સવારે અને રાત્રે ઠંડક વર્તાશે.

તહેવારની સિઝનમાં હવામાનમાં આવેલા આ બદલાવને ધ્યાનમાં રાખીને ખાસ કરીને દક્ષિણ ગુજરાતના લોકોએ પોતાની દિવાળીની તૈયારીઓ અને ઉજવણીની યોજનામાં ફેરફાર કરવો પડે તેવી સ્થિતિ ઊભી થઈ છે. ખેડૂતોને પણ માવઠાને કારણે ખેતીના પાકને નુકસાન થવાની ચિંતા સતાવી રહી છે.

English summary

3-Day Unseasonal Rain (Mavtha) Forecast for South Gujarat