ICC રેન્કિંગમાં ટીમ ઈન્ડિયાનો વાગ્યો ડંકો, ત્રણેય ફોર્મેટમાં આ 5 ભારતીય ખેલાડીઓ છે નંબર-1

ICC Rankings: ICC રેન્કિંગમાં ભારતીય ક્રિકેટ ટીમનું રાજ યથાવત છે. ટીમ ઈન્ડિયા ODI અને T20માં વિશ્વની નંબર-1 ટીમ છે. શુભમન ગિલ, જસપ્રીત બુમરાહ, રવિન્દ્ર જાડેજા સહિત 5 ભારતીય ખેલાડીઓ ત્રણેય ફોર્મેટ (ટેસ્ટ, ODI અને T20I) ની વિવિધ કેટેગરીમાં નંબર-1 છે. ICCએ બુધવાર, 30 જુલાઈના રોજ લેટેસ્ટ રેન્કિંગ જાહેર કર્યું હતું.

ICC મેન્સ ટીમ રેન્કિંગ

મેન્સ ટીમ રેન્કિંગમાં, ઓસ્ટ્રેલિયા ટેસ્ટમાં ટોપ પર છે, તે 124 પોઈન્ટ સાથે નંબર-1 પર છે. ટીમ ઈન્ડિયા 105 પોઈન્ટ સાથે ટેસ્ટ રેન્કિંગમાં ચોથા નંબર પર છે. તેમજ ટીમ ઈન્ડિયા ODI અને T20Iમાં ટોચ પર છે. ભારત ODIમાં 124 પોઈન્ટ અને T20માં 271 પોઈન્ટ સાથે વિશ્વની નંબર-1 ટીમ છે.

શુભમન ગિલ અને અભિષેક શર્મા નંબર-1 બેટ્સમેન

ICC મેન્સ ટેસ્ટ બેટિંગ રેન્કિંગમાં જો રૂટ નંબર-1 પર છે, પરંતુ ભારતીય બેટ્સમેન અન્ય બંને ફોર્મેટમાં ટોપ પર છે. શુભમન ગિલ 784 રેટિંગ પોઈન્ટ સાથે વિશ્વનો નંબર-1 ODI બેટ્સમેન છે. જ્યારે અભિષેક શર્મા 30 જુલાઈના રોજ T20I રેન્કિંગમાં નંબર-1 બેટ્સમેન બન્યો છે, તેણે ટ્રેવિસ હેડને પાછળ છોડી દીધો જે 1 વર્ષ માટે આ સ્થાન પર હતો.

જસપ્રીત બુમરાહ નંબર-1 ટેસ્ટ બોલર

ICC મેન્સની ટેસ્ટ બોલિંગ રેન્કિંગમાં જસપ્રીત બુમરાહ વિશ્વનો નંબર-1 બોલર છે. તેના 898 રેટિંગ પોઈન્ટ છે. જ્યારે ODI બોલિંગ રેન્કિંગમાં 671 પોઈન્ટ સાથે શ્રીલંકાનો મહિષ તિક્ષણા પ્રથમ સ્થાને છે. ભારતીય બોલર કુલદીપ યાદવ 650 પોઈન્ટ સાથે આ યાદીમાં બીજા નંબર પર છે. ન્યુઝીલેન્ડનો જેકબ ડફી T20I બોલિંગ રેન્કિંગમાં 717 પોઈન્ટ સાથે નંબર-1 પર છે. વરુણ ચક્રવર્તી આ યાદીમાં ત્રીજા નંબર પર છે.

રવિન્દ્ર જાડેજા અને હાર્દિક પંડ્યા નંબર-1 ઓલરાઉન્ડર

ICC મેન્સ ટેસ્ટ ઓલરાઉન્ડર રેન્કિંગમાં રવિન્દ્ર જાડેજા નંબર-1 છે. ODI ઓલરાઉન્ડર રેન્કિંગમાં અફઘાનિસ્તાનનો અઝમતુલ્લાહ ઉમરઝાઈ નંબર-1 છે. જ્યારે હાર્દિક પંડ્યા T20Iમાં વિશ્વનો નંબર-1 ઓલરાઉન્ડર છે.

ICC રેન્કિંગમાં ત્રણેય ફોર્મેટમાં આ 5 ભારતીય ખેલાડીઓ છે નંબર-1

શુભમન ગિલ- ODI નંબર-1 બેટ્સમેન
જસપ્રીત બુમરાહ- ટેસ્ટ નંબર-1 બોલર
અભિષેક શર્મા- T20I નંબર-1 બેટ્સમેન
રવિન્દ્ર જાડેજા- ટેસ્ટ નંબર-1 ઓલરાઉન્ડર
હાર્દિક પંડ્યા- T20I નંબર-1 ઓલરાઉન્ડર

English summary

Team India's dominance in ICC Rankings, a total of 5 Indian players are No-1 in all three formats