Gujarat airports : કેશોદ, પોરબંદર અને ભાવનગર એરપોર્ટનું વિસ્તરણ કરાશે, બે નવા એરપોર્ટ બનશે

Gujarat airports : ગુજરાત રાજ્ય દેશમાં આર્થિક વિકાસ અને પ્રવાસન ક્ષેત્રે અગ્રેસર રહેલું છે અને હવે આ વિકાસને વધુ વેગ આપવા માટે હવાઈ કનેક્ટિવિટીને સુદૃઢ બનાવવામાં આવી રહી છે.

રાજ્ય સરકારની યોજના મુજબ, ગુજરાતના ત્રણ મહત્ત્વના એરપોર્ટ્સનું વિસ્તરણ કાર્ય પૂરજોશમાં ચાલી રહ્યું છે, જ્યારે બે નવા એરપોર્ટના નિર્માણની પણ પ્રગતિ ચાલુ છે.

રાજ્યના કેશોદ, પોરબંદર અને ભાવનગર એરપોર્ટ્સનું વિસ્તરણ કાર્ય પ્રગતિ હેઠળ છે. આ એરપોર્ટ્સના વિસ્તરણથી વિમાનની અવરજવર અને પેસેન્જર ક્ષમતામાં વધારો થશે, જેનાથી આ શહેરોની આસપાસના વિસ્તારોને સીધો ફાયદો થશે.

કેશોદ એરપોર્ટ માટે 205 એકર સરકારી અને ખાનગી જમીન એરપોર્ટ ઓથોરિટીને ફાળવવામાં આવી છે. આ જમીનનો ઉપયોગ રન-વેને લંબાવવા અને એરપોર્ટની અન્ય સુવિધાઓ વધારવા માટે કરવામાં આવશે.

તેવી જ રીતે પોરબંદર અને ભાવનગર એરપોર્ટ્સના વિસ્તરણ માટે પણ વધારાની જમીન સંપાદિત કરવાની કામગીરી ચાલી રહી છે, જે આ એરપોર્ટ્સને વધુ મોટા અને આધુનિક બનાવશે.

આ વિસ્તરણ યોજનાની સાથે જ ગુજરાતના બે વ્યૂહાત્મક સ્થળો દ્વારકા અને દાહોદમાં નવા ગ્રીનફિલ્ડ એરપોર્ટ બનાવવાનું આયોજન છે. દ્વારકા એક પ્રમુખ યાત્રાધામ છે, ત્યાં નવું એરપોર્ટ બનવાથી દેશ-વિદેશના શ્રદ્ધાળુઓ અને પ્રવાસીઓ માટે મુસાફરી વધુ સરળ બનશે.

દાહોદમાં એરપોર્ટ બનવાથી પૂર્વ ગુજરાતના આદિવાસી બહુલ વિસ્તારમાં ઔદ્યોગિક અને આર્થિક વિકાસને નવી દિશા મળશે. આ બંને સ્થળોએ નવા એરપોર્ટ માટે જમીન સંપાદનનું કાર્ય પ્રગતિમાં છે.

English summary

Gujarat Airports Expansion: Keshod, Porbandar, Bhavnagar to be Expanded, Two New Airports to be Built