માત્ર 12 કરોડમાં બનેલી મલયાલમ ફિલ્મ '2018' બૉક્સ ઑફિસ પર સાબિત થઈ બ્લૉકબસ્ટર, હવે હિંદીમાં થશે રિલીઝ

Updated: Wednesday, May 10, 2023, 15:03 [IST]

નવી દિલ્લીઃ કેરળમાં હાલમાં એક ફિલ્મ રિલીઝ થઈ છે. જે વાસ્તવિક ઘટનાઓ પર આધારિત છે. આ ફિલ્મનુ નામ છે '2018'. ફિલ્મની વાર્તા, દિગ્દર્શન અને અભિનયની જોરદાર પ્રશંસા થઈ રહી છે.

થિયેટર્સમાં ફિલ્મ હાઉસફૂલ જઈ રહી છે. જેની માહિતી ફિલ્મના એક્ટરે ટ્વિટર પર આપી હતી. હવે આ ફિલ્મ હિંદીમાં પણ રિલીઝ કરવાની તૈયારી છે. મિન્નલ મુરલી ફેમ એક્ટર ટોવિનો થોમસ આ ફિલ્મમાં લીડ રોલમાં છે.

2018માં કેરળમાં આવેલા પૂર પર આધારિત આ ફિલ્મે પ્રથમ ત્રણ દિવસમાં લગભગ 9.20 કરોડ રૂપિયાની કમાણી કરી છે. ફિલ્મે શુક્રવારે રૂ. 1.75 કરોડ, શનિવારે રૂ. 3.25 કરોડ અને રવિવારે રૂ. 4.20 કરોડનું કલેક્શન કર્યુ હતુ. આ રીતે ફિલ્મ કલેક્શનમાં સતત વધારો થઈ રહ્યો છે અને તેના જોરદાર વખાણ પણ થઈ રહ્યા છે.

મલયાલમ ફિલ્મ 2018નું બજેટ લગભગ 12 કરોડ રૂપિયા હોવાનું કહેવાય છે. આ રીતે આ ફિલ્મ ખૂબ જ મર્યાદિત બજેટમાં બની છે. ફિલ્મને સતત વધી રહેલા પ્રતિસાદને જોતા, આગામી દિવસોમાં ફિલ્મનું વધુ શાનદાર કલેક્શનની અપેક્ષા છે.

મલયાલમ ફિલ્મ '2018' 5 મેના રોજ કેરળના સિનેમાઘરોમાં રિલીઝ થઈ છે. આ ફિલ્મનું નિર્દેશન જુડ એન્થોની જોસેફે કર્યું છે. આ ફિલ્મમાં ટોવિનો થોમસ, કુંચકો બોબન, આસિફ અલી, વિનીથ શ્રીનિવાસન, અપર્ણા બાલામુરલી છે. વિવેચકો અને લોકો ફિલ્મના જોરદાર વખાણ કરી રહ્યા છે.