Manu Bhaker : ત્રીજો મેડલ ચુક્યા બાદ મનુ ભાકરે શું કહ્યું?

ઓલિમ્પિકમાં ભારતીય મહિલા શૂટર મનું ભાકર સહેજ માટે ત્રીજો મેડલ ચુકી ગઈ. ભારત માટે બે મેડલ જીતનારી મનુ ભાકરે તેની હારને લઈને વાત કરી.

મનુ ભાકર મહિલાઓની 25 મીટર પિસ્તોલની ફાઇનલમાં 28 પોઈન્ટ સાથે ચોથા સ્થાને રહી. હંગેરીની વેરોનિકા મેજર શરૂઆતમાં ત્રીજા સ્થાન માટે ટાઈ રહી હતી, પરંતુ શૂટ-ઓફમાં મનુએ બે પોઈન્ટ ગુમાવ્યા, જેના કારણે મેજરને પોડિયમ પર સ્થાન મળ્યું.

દક્ષિણ કોરિયાની યાંગ જિને શૂટ-ઓફ (4-1) બાદ 37 પોઈન્ટ સાથે ગોલ્ડ મેડલ જીત્યો અને ફ્રાન્સની કેમિલી જેદ્રેજેવસ્કીએ સિલ્વર મેડલ જીત્યો. મનુ શુક્રવારે મહિલાઓની 25 મીટર પિસ્તોલ શૂટિંગ ક્વોલિફિકેશનમાં બીજા સ્થાને રહીને આ સમર ગેમ્સમાં તેની ત્રીજી ફાઇનલમાં પહોંચી હતી.

એક ઈન્ટરવ્યુમાં ભારતીય શૂટર મનુ ભાકરે તેના તાજેતરના સ્પર્ધાના પરિણામો વિશે પોતાની મિશ્ર લાગણીઓ શેર કરતા કહ્યું કે, હું બે મેડલ સાથે વાપસી કરીને ખુશ છું, પરંતુ અત્યારે હું ઉજવણી કરવાના મૂડમાં નથી કારણ કે ચોથું સ્થાન પૂરતું નથી. હું આજે નર્વસ અનુભવતી હતી, પણ આજના પરિણામથી ખુશ નથી.

મનુ ભાકરે આગળ કહ્યું કે, હું એ તમામ લોકોનો આભાર વ્યક્ત કરવા માંગુ છું જેઓ આ ઉતાર-ચઢાવ દરમિયાન મારી પડખે ઉભા રહ્યા. પ્રોત્સાહક મેસેજ અને મારી સાથે વાત કરવા માટે સમય કાઢીને વડાપ્રધાન નરેન્દ્ર મોદીનો વિશેષ આભાર. હું મીડિયા અને મારા કોચ જસપાલ રાણા, મારા મિત્રો અને કુટુંબીજનો અને બીજા બધાનો પણ આભારી છું જેઓ મારા માટે આધાર સ્તંભ છે.

English summary

Manu Bhaker: What did Manu Bhaker say after losing his third medal?