Rishabh Pant Practice Video: ટૂંક સમયમાં રિષભ પંત કરશે કમબેક, પહેલી વાર મેદાનમાં જોવા મળ્યા

Published: Thursday, November 9, 2023, 16:47 [IST]

Rishabh Pant Practice Video: ટીમ ઇન્ડિયાના સ્ટાર ખેલાડી રિષભ પંત ભારત જ નહીં પણ સમગ્ર દુનિયામાં લાખો કરોડો ફેન્સ છે. ગત વર્ષના અંતમાં એક માર્ગ અકસ્માતમાં ઘાયસ થયા બાદ અંદાજે એક વર્ષથી ક્રિકેટ દુર છે. આ વચ્ચે ફેન્સ અને રિષભ પંતને લઇને સારા સમાચાર સામે આવ્યા છે.

વર્લ્ડકપ બાદ ટીમ ઈન્ડિયા પણ ક્યાંક ને ક્યાંક સતત સિરીઝ રમતી જોવા મળશે, અને આ પછી આઈપીએલ પણ માર્ચના અંતમાં શરૂ થવાની શક્યતા છે. આવી સ્થિતિમાં ટીમ ઈન્ડિયા સિવાય આઈપીએલની ટીમ દિલ્હી કેપિટલ્સ માટે પણ આ સારા સમાચાર છે.

ઋષભ પંત 30 ડિસેમ્બર, 2022ના રોજ રોડ અકસ્માતમાં ગંભીર રીતે ઘાયલ થયો હતો. તેઓ પોતાની કારમાં દિલ્હીથી ઘરે જઈ રહ્યા હતા, પરંતુ આ દરમિયાન તેમની કાર ડિવાઈડર સાથે અથડાઈ હતી અને ત્યારબાદ તેમને હોસ્પિટલમાં દાખલ કરવામાં આવ્યા હતા. લાંબા સમય સુધી હોસ્પિટલમાં રહ્યા પછી, તેઓ એનસીએ ગયા અને ત્યાં પણ તેઓ ઝડપથી સાજા થવાનો પ્રયાસ કરી રહ્યા હતા.

આ સમયગાળા દરમિયાન ઘણા ખેલાડીઓએ ભારતીય ટીમમાં તેની જગ્યા ભરવાનો પ્રયાસ કર્યો, પરંતુ તેનું સ્થાન ભરવું સરળ કામ નથી, જ્યારે IPL 2023માં દિલ્હી કેપિટલ્સની ટીમ તેના વિના પ્રવેશી હતી. આ પછી ડેવિડ વોર્નરને ટીમનો નવો કેપ્ટન બનાવવામાં આવ્યો હતો, પરંતુ ટીમે ખૂબ જ ખરાબ પ્રદર્શન કર્યું અને પોઈન્ટ ટેબલમાં તળિયે રહી છે.

હવે સમાચાર આવી રહ્યા છે કે, ઋષભ પંત મેદાનમાં ઉતર્યો છે. કેટલાક મીડિયા રિપોર્ટ્સમાં એવો દાવો કરવામાં આવી રહ્યો છે કે, રિષભ પંત હાલમાં કોલકાતામાં છે અને શક્ય તેટલી વહેલી તકે પ્લેઈંગ પોઝિશન પર પહોંચવાનો પ્રયાસ કરી રહ્યો છે. કહેવાય છે કે, ભારતીય ટીમના પૂર્વ કેપ્ટન સૌરવ ગાંગુલી અને રિકી પોન્ટિંગ પણ ત્યાં છે. તેમની દેખરેખ હેઠળ તૈયારીઓ ચાલી રહી છે.

આ બંને દિગ્ગજ ખેલાડીઓ દિલ્હી કેપિટલ્સ સાથે સંકળાયેલા છે. જોકે અત્યારે એ કહેવું મુશ્કેલ છે કે, રિષભ પંત ક્યારે આંતરરાષ્ટ્રીય ક્રિકેટમાં વાપસી કરી શકશે, પરંતુ એ ચોક્કસ છે કે તે દિવસ દૂર નથી. તે જોવાનું પણ રસપ્રદ રહેશે કે રિષભ પંત IPL 2024 માટે ઉપલબ્ધ રહે છે કે પછી રાહ જોવી પડશે.