IND vs NZ: રિંકુ સિંહે એકસાથે તોડ્યા 14 ખેલાડીઓના રેકોર્ડ, જાણો શું કર્યું?

IND vs NZ Rinku Singh: ભારત અને ન્યૂઝીલેન્ડ વચ્ચે બુધવાર એટલે કે 28 જાન્યુઆરીના રોજ રમાયેલી ચોથી ટી-20 મેચમાં એક અનોખો રેકોર્ડ બન્યો હતો. આ રેકોર્ડ બનાવવામાં બેટ કે બોલની નહીં, પરંતુ હાથોની ચપળતાએ મોટી ભૂમિકા ભજવી હતી. ભારતીય ટીમના ઉભરતા સ્ટાર રિંકૂ સિંહે (Rinku Singh) વિશાખાપટ્ટનમના ACA-VDCA સ્ટેડિયમમાં ચાર શાનદાર કેચ ઝડપીને નવો ઇતિહાસ રચી દીધો છે.

14 ખેલાડીઓના રેકોર્ડને પાછળ છોડ્યા

રિંકૂ સિંહ હવે ભારતીય ધરતી પર કોઈ એક ટી-20 આંતરરાષ્ટ્રીય મેચમાં ચાર કેચ લેનાર પ્રથમ બિન-વિકેટકીપર (Non-wicketkeeper) ખેલાડી બની ગયો છે. તેના પહેલા ભારતમાં 14 અલગ-અલગ ખેલાડીઓએ 15 વખત એક ઇનિંગમાં ત્રણ કેચ લેવાનો પરાક્રમ કર્યો હતો. આ ખેલાડીઓમાં હાર્દિક પંડ્યા (બે વાર), વિરાટ કોહલી અને રોહિત શર્મા જેવા દિગ્ગજ નામ સામેલ હતા. રિંકૂએ આ તમામ દિગ્ગજોને પાછળ છોડીને આ 'ટાઈ' તોડી છે અને ટોચ પર પોતાનું નામ નોંધાવ્યું છે.

રિંકૂ સિંહની જબરદસ્ત ફિલ્ડિંગ

જ્યારે ન્યૂઝીલેન્ડની ટીમ બેટિંગ કરતા 215 રનનો વિશાળ સ્કોર ઊભો કરી રહી હતી, ત્યારે રિંકૂ સિંહે બાઉન્ડ્રી લાઇન પર સ્કોરને વધુ વધતો અટકાવવાનું કામ કર્યું હતું. તેણે ડેવોન કોનવે, ટિમ સીફર્ટ, ગ્લેન ફિલિપ્સ અને ઝાકરી ફોલ્ક્સ જેવા મુખ્ય બેટ્સમેનોના કેચ ઝડપ્યા હતા. તેની આ સજાગતાને કારણે જ ભારત મહત્વની ક્ષણોમાં કીવી ટીમના મોટા વિકેટ લેવામાં સફળ રહ્યું હતું.

આવું કરનાર બીજો ભારતીય ખેલાડી બન્યો

રિંકૂ સિંહ એક ઇનિંગમાં ચાર કેચ લેનાર ભારતનો બીજો ખેલાડી બન્યો છે. આ પહેલા વર્ષ 2014માં બર્મિંગહામમાં ઇંગ્લેન્ડ સામે અજિંક્ય રહાણેએ આ સિદ્ધિ મેળવી હતી. તે જ સમયે, આંતરરાષ્ટ્રીય સ્તરે ન્યૂઝીલેન્ડ સામે ચાર કેચ લેનાર તે વિશ્વનો બીજો બિન-વિકેટકીપર છે. તેના પહેલા પાકિસ્તાનના સાયમ અયૂબે (ઓકલેન્ડ, 2024) આ કમાલ કર્યો હતો.

English summary

Rinku Singh becomes the first non-wicketkeeper to take 4 catches in a T20I in India, surpassing Rohit & Kohli.