IND vs AUS : રો-કોની ધમાલ સામે ઓસ્ટ્રેલિયા બેબસ, ત્રીજા વનડેેમાં ભારતની જીત

સિડનીમાં રમાયેલી એકદિવસીય મેચમાં ભારતીય ટીમે યજમાન ઓસ્ટ્રેલિયાને 9 વિકેટે પરાજય આપ્યો છે, જોકે સીરિઝ ઓસ્ટ્રેલિયાએ 2-1થી જીતી છે. ભારતીય બોલરોના પ્રભાવશાળી પ્રદર્શનને કારણે ઓસ્ટ્રેલિયા 46.4 ઓવરમાં માત્ર 236 રનમાં ઓલઆઉટ થયું હતું. જવાબમાં રોહિત શર્માની શાનદાર સદી અને વિરાટ કોહલીની અડધી સદીની મદદથી ભારતે સરળ વિજય મેળવ્યો.

ટોસ જીતીને પ્રથમ બેટિંગ કરતા ઓસ્ટ્રેલિયાના કેપ્ટન મિચલ માર્શે ટીમને ઝડપી શરૂઆત અપાવી. તેમણે 50 બોલમાં 5 ચોગ્ગા અને 1 છગ્ગા સાથે 41 રન બનાવ્યા. ટ્રેવિસ હેડે પણ 25 બોલમાં 29 રનની વિસ્ફોટક ઇનિંગ રમી, પરંતુ બંને બેટ્સમેન મોટી ઇનિંગ્સમાં તેને બદલી શક્યા નહીં.

મિડલ ઓર્ડરમાં મેથ્યુ શોર્ટ અને મેટ રેનશોએ ઇનિંગ્સને સંભાળવાનો પ્રયાસ કર્યો. રેનશોએ 58 બોલમાં 2 ચોગ્ગા સાથે સર્વાધિક 56 રન બનાવ્યા, જ્યારે શોર્ટે 30 રનનું યોગદાન આપ્યું. વિકેટકીપર એલેક્સ કેરી (24 રન) અને કૂપર કોનોલી (23 રન)એ થોડો સમય ટકવાનો પ્રયાસ કર્યો, પરંતુ ભારતીય બોલરો નિયમિત અંતરાલે વિકેટ ઝડપતા રહ્યા, જેના કારણે ઓસ્ટ્રેલિયા મોટો સ્કોર બનાવી શક્યું નહીં.

ભારતીય બોલરોમાં હર્ષિત રાણાએ પ્રભાવશાળી પ્રદર્શન કરતા 4 વિકેટ ઝડપી, જેમાં કેરી, કોનોલી, ઓવેન અને હેઝલવુડની વિકેટોનો સમાવેશ થાય છે. વોશિંગ્ટન સુંદરે 2 વિકેટ લઈને મિડલ ઓર્ડરને ધ્રુજાવ્યો, જ્યારે મોહમ્મદ સિરાજ, અક્ષર પટેલ, કુલદીપ યાદવ અને પ્રસિદ્ધ કૃષ્ણાએ 1-1 વિકેટ મેળવી.

237 રનના લક્ષ્યનો પીછો કરતા, ભારતીય ઓપનર રોહિત શર્મા અને શુભમન ગિલે ઓસ્ટ્રેલિયન બોલરો પર આક્રમણ કર્યું. ભારતને 69 રનના સ્કોર પર શુભમન ગિલ (24 રન)ના રૂપમાં પહેલો ઝટકો લાગ્યો. ગિલના આઉટ થયા બાદ વિરાટ કોહલી મેદાન પર આવતા જ દર્શકોએ ઊભા થઈને તેમનું સ્વાગત કર્યું.

રોહિત અને કોહલીએ ઇનિંગ્સને મજબૂત રીતે આગળ વધારી. રોહિતે પોતાની સતત બીજી અર્ધસદી પૂરી કરી, જે વનડેમાં તેમની 60મી અર્ધસદી છે. બંનેએ મળીને સ્કોર 150 રન પાર કરાવ્યો. રોહિત અને કોહલીએ ઓસ્ટ્રેલિયન બોલરોને પરેશાન કરવાનું ચાલુ રાખ્યું. કોહલીએ પણ પોતાની અર્ધસદી પૂરી કરી અને ત્યારબાદ રોહિતે પોતાની 33મી સદી ફટકારી.

આ દરમિયાન ભારતીય ટીમનો સ્કોર 200 રન પાર થઈ ગયો અને ટીમ ઇન્ડિયાની જીત નિશ્ચિત બની. રોહિત શર્માએ 125 બોલમાં 13 ચોગ્ગા અને 3 છગ્ગાની મદદથી અણનમ 121 રન બનાવ્યા. કોહલીએ પણ 81 બોલમાં 7 ચોગ્ગા સાથે અણનમ 74 રન ફટકાર્યા. ભારતે 39મી ઓવરમાં 1 વિકેટે 237 રન બનાવીને મેચ જીતી લીધી.

English summary

In a one-day international in Sydney, India defeated Australia by 9 wickets. Despite Australia's series win, India's bowlers restricted Australia to 236 runs, allowing a strong chase led by Rohit Sharma and Virat Kohli.