Sunita Williams Retirement: સુનિતા વિલિયમ્સે છોડી અંતરિક્ષની દુનિયા, 27 વર્ષ બાદ NASAમાંથી નિવૃત્ત

Sunita Williams Retirement: પ્રખ્યાત અવકાશયાત્રી સુનિતા વિલિયમ્સ દ્વારા નાસા (NASA) માંથી નિવૃત્તિની જાહેરાત સાથે અવકાશ સંશોધનના એક સુવર્ણ યુગનો અંત આવ્યો છે. 27 ડિસેમ્બર 2025થી અમલી બનેલી તેમની આ નિવૃત્તિએ 27 વર્ષની ઐતિહાસિક કારકિર્દી પર પૂર્ણવિરામ મૂક્યું છે. પોતાની સફર દરમિયાન તેમણે ઇન્ટરનેશનલ સ્પેસ સ્ટેશન (ISS) પર ત્રણ સફળ મિશન પૂર્ણ કર્યા અને અવકાશમાં સૌથી વધુ સમય ચાલવા (Spacewalk) કરનાર મહિલાઓમાં પોતાનું નામ સુવર્ણ અક્ષરે નોંધાવ્યું.

ભારતીય મૂળના સુનિતા વિલિયમ્સ માત્ર એક અવકાશયાત્રી જ નહીં, પરંતુ વિશ્વભરના યુવાનો માટે સાહસ અને પ્રેરણાનું પ્રતીક બની રહેશે.

અવકાશમાં વિતાવ્યા 608 દિવસ

સુનિતા વિલિયમ્સની અવકાશ સફર માત્ર વિજ્ઞાનની જીત નથી, પરંતુ એક મહિલાના ક્યારેય હાર ન માનવાના જુસ્સાની વાર્તા છે. 60 વર્ષની વયે નાસામાંથી નિવૃત્ત થયેલા સુનિતાએ પોતાની 27 વર્ષની કારકિર્દીમાં એવા મુકામ હાંસલ કર્યા છે જે કોઈપણ માટે સ્વપ્ન સમાન હોય. તેમણે અવકાશમાં કુલ 608 દિવસ વિતાવ્યા અને નવ વખત યાનની બહાર નીકળીને સ્પેસવોક કર્યું. તેઓ અવકાશમાં મેરેથોન દોડનાર વિશ્વના પ્રથમ માનવી પણ બન્યા હતા. તેમની નિવૃત્તિ પર નાસાએ તેમને એક એવા 'પથદર્શક' (Pioneer) ગણાવ્યા છે, જેમના અનુભવોની મદદથી હવે મનુષ્ય માટે ચંદ્ર અને મંગળ સુધી પહોંચવું વધુ સરળ બનશે.

પડકારોને તકમાં બદલ્યા: જ્યારે અંતરિક્ષમાં ફસાયા

તાજેતરમાં જ્યારે તેઓ 2024ના 'બોઈંગ સ્ટારલાઈનર' મિશન પર ગયા હતા, ત્યારે ટેકનિકલ ખામીને કારણે તેમને 8 દિવસને બદલે 9 મહિના અવકાશમાં વિતાવવા પડ્યા હતા. આવી સ્થિતિમાં કોઈપણ વ્યક્તિ ગભરાઈ શકે છે, પરંતુ સુનિતાએ તેને એક અવસર તરીકે લીધો. તેમણે ત્યાં 'રોમેન લેટ્યુસ' નામનો છોડ ઉગાડીને ખેતી કરી, જેથી ભવિષ્યમાં અવકાશયાત્રીઓ પોતાનો ખોરાક જાતે ઉગાડી શકે. મુશ્કેલ સમયમાં પણ શાંત રહીને સંશોધન ચાલુ રાખવું એ જ તેમને એક મહાન વૈજ્ઞાનિક બનાવે છે.

NASA Astronaut Sunita Williams: નેવી કેપ્ટનથી અંતરિક્ષ કમાન્ડર સુધીની સફર

નાસામાં જોડાતા પહેલા સુનિતા વિલિયમ્સ અમેરિકી નૌકાદળ (Navy) માં કેપ્ટન હતા. ત્યાંથી જ તેમણે શિસ્ત અને નેતૃત્વના ગુણો શીખ્યા હતા. તેમણે સ્પેસ સ્ટેશનના કમાન્ડર તરીકે પણ જવાબદારી નિભાવી અને અનેક જટિલ મિશન સફળતાપૂર્વક પૂર્ણ કર્યા. આજે જ્યારે તેઓ નિવૃત્ત થઈ રહ્યા છે, ત્યારે તેઓ પોતાની પાછળ એક એવો વારસો છોડી રહ્યા છે જે આગામી અવકાશયાત્રીઓને ચંદ્ર અને મંગળ ગ્રહ પર વસવાટ કરવાના ભારત અને અમેરિકાના સહિયારા સપનાઓને સાકાર કરવાની પ્રેરણા આપશે.

English summary

Legendary astronaut Sunita Williams has retired from NASA after 27 years and 608 days in space. She holds the record for most spacewalks by a woman.