હિઝબુલ્લાહ વિરૂદ્ધ ઇઝરાયેલી સેનાનો મોટી કાર્યવાહીનો દાવો, 3 કમાન્ડર ઠાર

ગાઝા અને પેલેસ્ટાઈનમાં નરસંહાર કરનારૂ ઇઝરાયેલ લેબનાનમાં સતત કાર્યવાહી કરી રહ્યું છે. હવે ઇઝરાયેલી સેનાએ એક મોટી કાર્યવાહીમાં હિઝબુલ્લાહના 3 કમાન્ડરને ઠાર કર્યાનો દાવો કર્યો છે.

ઇઝરાયેલી સેનાના દાવા અનુસાર માર્યા ગયેલા કમાન્ડરોના નામ અહેમદ જાફર માટોક, બિન્ત જબીલ ક્ષેત્રના હિઝબુલ્લાહ વડા, તેના અનુગામી અને તે જ વિસ્તારમાં જૂથના આર્ટિલરી ચીફનો સામેલ છે.

અહેવાલો અનુસાર, વધી રહેલા તણાવ વચ્ચે ઈરાન પર ઈઝરાયેલના હવાઈ હુમલા બાદ આ હુમલો કરાયો છે. ઇઝરાયેલી સેનાના નિવેદન અનુસાર, હિઝબુલ્લાહના ગઢ પરના લક્ષ્યાંકિત હુમલાઓમાં 70 થી વધુ હિઝબોલ્લાહ લડવૈયાઓ માર્યા ગયા છે અને 120 થી વધુ લક્ષ્યો પર ચોક્કસ હુમલા કરવામાં આવ્યા છે.

આ હુમલામાં હથિયારોની ફેક્ટરીઓ અને સ્ટોરેજ સુવિધાઓનો સમાવેશ થાય છે. આ દક્ષિણ બેરૂતના હિઝબુલ્લાહના ગઢમાં સ્થિત છે. આ સિવાય પૂર્વીય શહેર બાલબેક અને લેબનોનના અન્ય વ્યૂહાત્મક સ્થળો પર પણ હુમલા કરાયા છે. આ હુમલાએ વિસ્તારમાં તણાવ વધાર્યો છે.

જણાવી દઈએ કે, ઇઝરાયેલ સતત લેબનાનમાં હુમલા કરી રહ્યું છે. આ હુમલામાં ઘણા નિર્દોષ લોકોએ તેમના જીવ ગુમાવ્યા છે. બીજી તરફ ઇઝરાયેલી સેનાને પણ ભારે નુકસાન ઉઠાવવુ પડ્યુ છે.

દક્ષિણ લેબનાનમાં ચાર સૈનિકોની હત્યા બાદ 30 સપ્ટેમ્બરે ગ્રાઉન્ડ ઓપરેશન શરૂ થયું ત્યારથી 36 ઇઝરાયેલી સૈનિકોએ જીવ ગુમાવ્યો છે. એક આંકડા અનુસાર 1615 જેટલા લોકોએ આ હુમલાઓમાં પોતાના જીવ ગુમાવ્યા છે.

English summary

Israeli army claims major action against Hezbollah, 3 commanders killed