Winter session round up : રાજ્યસભામાં ચૂંટણી સુધારણા બીલ પાસ, વિપક્ષે કર્યું વોકઆઉટ

લોકસભા અને રાજ્યસભા બંનેમાં વિપક્ષના સાંસદોના હોબાળા વચ્ચે સંસદ હવે આ વર્ષે શિયાળુ સત્રના અંતિમ દિવસોમાં છે અને ઘણા બીલો રજૂ કર્યા છે અને પસાર કર્યા છે.

Published: Tuesday, December 21, 2021, 17:17 [IST]

Winter session round up : લોકસભા અને રાજ્યસભા બંનેમાં વિપક્ષના સાંસદોના હોબાળા વચ્ચે સંસદ હવે આ વર્ષે શિયાળુ સત્રના અંતિમ દિવસોમાં છે અને ઘણા બીલો રજૂ કર્યા છે અને પસાર કર્યા છે.

રાજ્યસભામાં ચૂંટણી સુધારણા બીલ પાસ, વિપક્ષે કર્યું વોકઆઉટ

સંસદે મંગળવારના રોજ ચૂંટણી કાયદા (સુધારા) બીલ, 2021 પસાર કર્યું છે. રાજ્યસભાએ વિપક્ષના વોકઆઉટ વચ્ચે અવાજ મત દ્વારા તેને મંજૂરી આપી હતી. આ બીલ મતદારોના ડુપ્લિકેશનને દૂર કરવા અને નકલી મતોનો નિકાલ કરવા માટે મતદાર યાદીને આધાર ઇકોસિસ્ટમ સાથે લિંક કરવાનો પ્રયાસ કરે છે. તેને સોમવારના રોજ લોકસભામાં પસાર કરવામાં આવ્યું હતું.

વિપક્ષી પક્ષો મતોના વિભાજનની માગ કરી રહ્યા હતા. કારણ કે, તેઓએ બીલને પસંદગી સમિતિને મોકલવાની દરખાસ્ત કરી હતી, જેને અવાજ મત દ્વારા નકારી કાઢવામાં આવી હતી. કોંગ્રેસ, ટીએમસી, ડાબેરી પક્ષો, ડીએમકે અને એનસીપી જેવા વિરોધ પક્ષોના સભ્યોએ વિરોધમાં ગૃહમાંથી વોકઆઉટ કર્યું હતું.

BJP, JD(U), YSRCP, AIADMK, BJD અને TMC-M ના સભ્યોએ તેને સમર્થન આપ્યા બાદ રાજ્યસભાએ બીલને મંજૂરી આપી હતી, અને કહ્યું હતું કે, તે મતદાર યાદીમાંથી ડુપ્લિકેટ અને નકલી મતોનો નિકાલ કરવામાં મદદ કરશે.

મહિલાઓ માટે લગ્નની ઉંમર વધારવાનું બીલ પાર પેનલને મોકલાયુ

વિપક્ષી સભ્યોના વિરોધ વચ્ચે મંગળવારના રોજ લોકસભામાં પુરૂષો અને સ્ત્રીઓ માટે લગ્નની સમાન વય રાખવાનો પ્રયાસ કરતું એક બીલ રજૂ કરવામાં આવ્યું હતું, જેમાં કેન્દ્રીય મંત્રી સ્મૃતિ ઈરાનીએ અધ્યક્ષને સંસદીય પેનલને મોકલવા વિનંતી કરી હતી.

ઈરાનીએ બાળ લગ્ન પ્રતિબંધ (સુધારા) બીલ 2021 રજૂ કર્યું હતું. જે મહિલાઓ માટે લગ્ન કરવાની કાયદેસર લઘુત્તમ વય વધારીને 21 વર્ષ કરવા માગે છે, તેને પુરૂષોની સમકક્ષ લાવી છે.

ઈરાનીએ જણાવ્યું હતું કે, આ બીલ લગ્નના સંબંધમાં પક્ષકારોને સંચાલિત કરતી કોઈપણ રિવાજ, ઉપયોગ અથવા પ્રથા સહિત તમામ હાલના કાયદાઓને ઓવરરાઈડ કરવા માગે છે. બીલને વિગતવાર તપાસ માટે સંસદીય પેનલને મોકલવામાં આવ્યું હતું. લખીમપુર ખેરી હત્યા સહિત વિવિધ મુદ્દાઓ પર વિપક્ષી સભ્યોના સતત વિરોધ વચ્ચે ગૃહને પછીથી દિવસ માટે સ્થગિત કરવામાં આવ્યું હતું.

રાજ્યમંત્રી અજય મિશ્રાને બરતરફ કરવાની માંગણી માટે વિપક્ષે રેલી યોજી

લખીમપુર ખેરી હિંસા કેસમાં કેન્દ્રીય પ્રધાન અજય મિશ્રા સામે પગલાં લેવાની માગણી સાથે વિપક્ષના નેતાઓએ મંગળવારના રોજ વિરોધ માર્ચ યોજી હતી. કોંગ્રેસના નેતા રાહુલ ગાંધીએ જણાવ્યું હતું કે, જ્યાં સુધી મંત્રીને જેલમાં ન મોકલવામાં આવે ત્યાં સુધી તેઓ આરામ કરશે નહીં.

અનેક વિપક્ષી દળોના નેતાઓએ સંસદ સંકુલની અંદર ગાંધી પ્રતિમાથી વિજય ચોક સુધી રેલી કાઢી હતી અને માંગણી કરી હતી કે, લખીમપુર હિંસા કેસમાં જેમના પુત્રની ધરપકડ કરવામાં આવી છે. તેવા મંત્રીને તાત્કાલિક બરતરફ કરવામાં આવે.

તેઓએ તેમના 12 સાંસદોનું સસ્પેન્શન તાત્કાલિક રદ્દ કરવાની માગ પણ કરી હતી. વિવિધ પક્ષોના સાંસદોએ સરકાર વિરુદ્ધ સૂત્રોચ્ચાર કર્યા હતા અને મંત્રીને તાત્કાલિક બરતરફ કરવાની માગ કરતા પ્લેકાર્ડ અને બેનર્સ હાથમાં લીધા હતા.

CA, કોસ્ટ એકાઉન્ટન્ટ્સ, કંપની સેક્રેટરીઓ અંગેનું બીલ સ્થાયી સમિતિને મોકલાયું

લોકસભાએ મંગળવારના રોજ ચાર્ટર્ડ એકાઉન્ટન્ટ્સ, કોસ્ટ એકાઉન્ટન્ટ્સ અને કંપની સેક્રેટરીઓને સંચાલિત કરતા કાયદાઓમાં સુધારો કરવા માટેનું બીલ વધુ ચકાસણી માટે સ્થાયી સમિતિને મોકલ્યું હતું. સંસદીય બાબતોના રાજ્ય મંત્રી અર્જુન રામ મેઘવાલે બીલને પેનલમાં મોકલવાની દરખાસ્ત મૂકી હતી. તેમણે કહ્યું કે, નાણાંપ્રધાન નિર્મલા સીતારમણે વિનંતી કરી હતી કે, તેને સ્થાયી સમિતિને મોકલવામાં આવે. તેમણે વધુમાં જણાવ્યું હતું કે, સ્થાયી સમિતિએ આગામી બજેટ સત્રમાં તેનો અહેવાલ સુપરત કરવો જોઈએ.

કાનૂનમાં 'રાષ્ટ્રવિરોધી' શબ્દની વ્યાખ્યા નથી, કટોકટી દરમિયાન પ્રથમ દાખલ કરવામાં આવ્યું : લોક સભામાં સરકાર

'રાષ્ટ્રવિરોધી' શબ્દને કાયદાઓમાં વ્યાખ્યાયિત કરવામાં આવ્યો નથી, પરંતુ 1976માં કટોકટી દરમિયાન બંધારણમાં સૌપ્રથમ વખત દાખલ કરવામાં આવ્યો હતો અને ત્યારબાદ એક વર્ષ પછી તેને દૂર કરવામાં આવ્યો હતો, કેન્દ્રીય મંત્રી નિત્યાનંદ રાયે મંગળવારના રોજ લોકસભામાં માહિતી આપી હતી.

રાયે આ વાત હૈદરાબાદના સાંસદ અસદુદ્દીન ઓવૈસીના પ્રશ્નના જવાબમાં કહી હતી, જેમણે પૂછ્યું હતું કે, શું સરકારે દેશમાં લાગુ કરાયેલા કોઈપણ કાયદા અથવા 11 નિયમો અથવા અન્ય કોઈ કાયદાકીય કાયદા હેઠળ 'રાષ્ટ્ર વિરોધી'નો અર્થ વ્યાખ્યાયિત કર્યો છે.

Published On December 21, 2021