IPL 2026: RCBએ હૈદરાબાદને ખરાબ રીતે હરાવ્યું, કોહલીની તોફાની બેટિંગ

RCB vs SRH: IPLની આ સીઝનની પ્રથમ મેચ RCBના નામે રહી. ટોસ હારીને પ્રથમ બેટિંગ કરતા સનરાઈઝર્સ હૈદરાબાદે 9 વિકેટે 201 રન બનાવ્યા હતા, જેની સામે RCBએ માત્ર 4 વિકેટ ગુમાવીને સરળતાથી લક્ષ્ય હાંસલ કરી લીધું હતું.

RCBએ પોતાની ટીમમાં બોલિંગને મજબૂત કરવા માટે જેકબ ડફી અને અભિનંદન સિંહ જેવા ખેલાડીઓનો સમાવેશ કર્યો હતો. બીજી તરફ હૈદરાબાદની ટીમમાં સલિલ અરોરાને તક આપવામાં આવી હતી.

ટોસ હારીને પ્રથમ બેટિંગ કરવા ઉતરેલી હૈદરાબાદની શરૂઆત નબળી રહી હતી. અભિષેક શર્મા અને ટ્રેવિસ હેડ બંને લાંબુ ટકી શક્યા નહીં. અભિષેક શર્મા 8 બોલમાં 7 રન બનાવી આઉટ થયો, જ્યારે હેડે 9 બોલમાં 11 રન બનાવ્યા. 5 ઓવરમાં નીતીશ રેડ્ડીના રૂપમાં હૈદરાબાદે ત્રીજી વિકેટ ગુમાવી હતી, તે માત્ર 1 રન બનાવી શક્યો અને સ્કોર 29/3 થઈ ગયો. ત્યારબાદ ઈશાન કિશને કેટલાક સારા શોટ્સ ફટકારીને 6 ઓવરમાં સ્કોર 49 રન સુધી પહોંચાડ્યો હતો.

ઈશાન કિશન ચમક્યો (RCB vs SRH)

અહીંથી હૈદરાબાદની ઇનિંગ્સ કેપ્ટન ઈશાન કિશન અને હેનરિક ક્લાસેને સંભાળી હતી. બંનેએ શાનદાર શોટ્સ ફટકારીને 10 ઓવરમાં સ્કોર 3 વિકેટે 87 સુધી પહોંચાડ્યો હતો. કિશન 24 બોલમાં 45 રન બનાવી ક્રિઝ પર હતો અને ક્લાસેનનો સ્કોર 19 હતો. ત્યારબાદ કિશને 27 બોલમાં પોતાની ફિફ્ટી પૂરી કરી. તેણે વર્લ્ડ કપના ફોર્મને જાળવી રાખતા ટીમને 100 રનને પાર પહોંચાડી દીધી. 15 ઓવરમાં હૈદરાબાદનો સ્કોર 5 વિકેટે 142 રન હતો. ત્યારબાદ ઈશાન કિશન 38 બોલમાં 80 રન બનાવીને આઉટ થયો, જેમાં તેણે 8 ચોગ્ગા અને 5 છગ્ગા ફટકાર્યા હતા.

અંતમાં અનિકેત વર્માએ તોફાની બેટિંગ કરતા ચોગ્ગા-છગ્ગાનો વરસાદ કર્યો અને 18 બોલમાં 43 રનની ઇનિંગ રમી. તેણે 4 છગ્ગા અને 3 ચોગ્ગા લગાવ્યા. તેની આ ઇનિંગના કારણે હૈદરાબાદે 9 વિકેટે 201 રનનો સ્કોર બનાવ્યો. RCB તરફથી ડફી અને રોમારિયો શેફર્ડે 3-3 વિકેટ ઝડપી હતી.

જવાબી ઇનિંગમાં રમતા RCBની શરૂઆત પણ ખરાબ રહી હતી, ઓપનર બેટ્સમેન ફિલ સોલ્ટ માત્ર 8 રન બનાવી આઉટ થયો હતો. ત્યારબાદ દેવદત્ત પડિક્કલ અને વિરાટ કોહલીએ મેદાન ગજવ્યું હતું. પડિક્કલે તોફાની અંદાજમાં રમતા 26 બોલમાં 61 રન બનાવ્યા, જેમાં 7 ચોગ્ગા અને 3 છગ્ગા સામેલ હતા. રજત પાટીદાર 12 બોલમાં 31 રન બનાવીને આઉટ થયો. આ દરમિયાન કોહલી એક છેડે ટકી રહ્યો અને 33 બોલમાં પોતાની ફિફ્ટી પૂરી કરી. 14 ઓવરમાં RCBએ 4 વિકેટે 170 રન બનાવી લીધા હતા.

કોહલીનો તોફાની અંદાજ (RCB vs SRH)

કોહલીએ આક્રમક બેટિંગ કરતા 38 બોલમાં અણનમ 69 રન બનાવ્યા, જેમાં 5 ચોગ્ગા અને 5 છગ્ગા ફટકાર્યા હતા. ટિમ ડેવિડે અણનમ 16 રન ઉમેર્યા. આ રીતે RCBએ 16મી ઓવરમાં 4 વિકેટે 203 રન બનાવીને સરળતાથી મેચ જીતી લીધી હતી.

English summary

RCB starts IPL 2026 with a bang! Virat Kohli’s unbeaten 69 and Padikkal’s fiery 61 help RCB chase down 202 against SRH in just 16 overs. Read the full match report and top performers here.