ગૌતમ અદાણી સામે ભારતમાં લાંચ આપવાનો આરોપ છતાં અમેરિકામાં કેમ કેસ દાખલ થયો? જાણો કારણ

Gautam Adani: અમેરિકામાં ઉદ્યોગપતિ ગૌતમ અદાણી વિરુદ્ધ ધરપકડ વોરંટ જારી કરવામાં આવ્યું છે. તેના પર ભારતમાં લાંચ આપવાનો અને અમેરિકન રોકાણકારોને છેતરવાનો આરોપ છે. તમારા મનમાં એક મોટો પ્રશ્ન ઊભો થતો હશે કે જો અદાણી પર ભારતમાં અધિકારીઓને લાંચ આપવાનો આરોપ છે તો અમેરિકામાં તેની સામે ધરપકડનું વોરંટ કેમ બહાર પાડવામાં આવ્યું છે.

આનો સીધો જવાબ એ છે કે અમેરિકન સરકારના બે અત્યંત મહત્વના વિભાગો છે, એક ડિપાર્ટમેન્ટ ઓફ જસ્ટિસ અને બીજું છે સિક્યોરિટીઝ એન્ડ એક્સચેન્જ કમિશન (SEC). આ બંને વિભાગો સરકારી વકીલ સાથે ન્યુયોર્ક કોર્ટમાં પહોંચ્યા હતા અને કોર્ટને જણાવ્યું હતું કે અદાણી ગ્રુપ થોડા સમય પહેલા અમેરિકા આવ્યું હતું.

સારું વળતર મળશે તેવી અપાઈ હતી ખાતરી

આ જૂથ વતી અમેરિકન રોકાણકારોને ખાતરી આપવામાં આવી હતી કે જો તમે અમારી કંપનીમાં રોકાણ કરશો તો તમને સારું વળતર મળશે. કંપની દ્વારા બોન્ડ પણ જારી કરવામાં આવ્યા હતા. બોન્ડની વાત કરીએ તો ધારો કે કંપની દ્વારા રોકાણકારોને કહેવામાં આવ્યું કે તમે અમારી કંપનીમાં 10-20 અથવા 30 મિલિયન ડોલર આપો તો અમે તમને દર વર્ષે 7-8 ટકા વળતર આપીશું.

અદાણીએ ભારતમાં કર્યો ભષ્ટ્રચાર: US સરકાર

પરંતુ અમેરિકી સરકારનું કહેવું છે કે અદાણીએ ભારતમાં ભ્રષ્ટાચાર કર્યો છે અને સરકારી કર્મચારીઓને લાંચ આપી છે. આવી સ્થિતિમાં ભારતમાં તેમની સામે ગમે ત્યારે કાર્યવાહી થઈ શકે છે, તેમના શેરોમાં ગમે ત્યારે ઘટાડો શરૂ થઈ શકે છે, જેના કારણે અમેરિકન રોકાણકારોને પણ નુકસાન થશે. આ જ કારણ છે કે ગૌતમ અદાણી વિરુદ્ધ ધરપકડ વોરંટ જારી કરવામાં આવ્યું છે.

દોષિત પુરવાર ન થઈએ ત્યાં સુધી નિર્દોષ: અદાણી

જો કે, આ માત્ર આક્ષેપો જ થયા છે, આ સમગ્ર કેસમાં હજુ સુધી ગૌતમ અદાણી દોષિત સાબિત થયા નથી. તેની સામે માત્ર આરોપો છે. અદાણી ગ્રુપ દ્વારા જારી કરવામાં આવેલા નિવેદનમાં કહેવામાં આવ્યું છે કે જ્યાં સુધી દોષિત પુરવાર ન થાય ત્યાં સુધી અમે નિર્દોષ છીએ.

યુએસ સરકારે લાદ્યો આરોપઃ
અમેરિકી સરકારના સરકારી વકીલે કોર્ટમાં કેટલાક પુરાવા રજૂ કર્યા અને કહ્યું કે આ મામલે કેસ નોંધવામાં આવશે. જે બાદ કોર્ટમાં ગૌતમ અદાણી વિરુદ્ધ સત્તાવાર રીતે આરોપો દાખલ કરવામાં આવ્યા છે.

ડોનાલ્ડ ટ્રમ્પ સાથે પણ આવુ જ બન્યુ હતુ

ડોનાલ્ડ ટ્રમ્પ સાથે પણ આવો જ એક કિસ્સો બન્યો હતો, કોર્ટમાં તેમની સામે સત્તાવાર રીતે આરોપો દાખલ કરવામાં આવ્યા હતા, પરંતુ ડોનાલ્ડ ટ્રમ્પ દોષિત સાબિત થયા ન હતા.

હાલ માત્ર આરોપ લાગ્યા છે

વાસ્તવમાં, જ્યારે અમેરિકન કોર્ટમાં કોઈની વિરુદ્ધ કોઈ પુરાવા રજૂ કરવામાં આવે છે, ત્યારે તે પહેલા નક્કી કરવામાં આવે છે કે તેના આધારે આરોપી વિરુદ્ધ સત્તાવાર રીતે આરોપો દાખલ કરી શકાય છે કે નહીં. સત્તાવાર રીતે આરોપો ઘડ્યા પછી, આરોપીઓ સામે ટ્રાયલ શરૂ થાય છે. આવું જ કંઈક અમેરિકામાં ગૌતમ અદાણી સામે થયું છે.

ગૌતમ અદાણીની ધરપકડ કરો
અમેરિકામાં ગૌતમ અદાણીને આરોપી બનાવ્યા બાદ રાહુલ ગાંધીએ પણ પ્રેસ કોન્ફરન્સ કરી ગૌતમ અદાણીની તાત્કાલિક ધરપકડ કરવામાં આવે તેવી માંગણી કરી હતી. નોંધનીય છે કે ભારત અને અમેરિકા વચ્ચે પ્રત્યાર્પણ કરાર છે. તેનો અર્થ એ છે કે બંને દેશ પોતાના દેશમાં આરોપીના પ્રત્યાર્પણની માંગ કરી શકે છે. આ કારણે રાહુલ ગાંધી ખુલ્લેઆમ કહી રહ્યા છે કે ગૌતમ અદાણી પર 2000 કરોડના કૌભાંડનો આરોપ છે, તેમની તાત્કાલિક ધરપકડ થવી જોઈએ.