Bihar SIR : બિહાર SIR મુદ્દે સુપ્રીમ કોર્ટે ઈલેક્શન કમિશનનુ બોચુ પકડ્યુ, 65 લાખ નામ જાહેર કરવા આદેશ

Bihar SIR : સુપ્રીમ કોર્ટે બિહાર SIR કેસની સુનાવણી દરમિયાન ચૂંટણી પંચને એક મહત્ત્વપૂર્ણ આદેશ આપ્યો છે. કોર્ટે જણાવ્યું છે કે, બિહારમાં કપાયેલા 65 લાખ મતદારોના નામ જિલ્લા કક્ષાની વેબસાઈટ પર પ્રકાશિત કરવામાં આવે.

આ માહિતીને લોકો માટે સરળતાથી સુલભ બનાવવાનો નિર્દેશ પણ આપવામાં આવ્યો છે. અદાલતે આ પ્રક્રિયામાં વધુ પારદર્શિતા અને વ્યાપક પ્રચાર પર ભાર મૂક્યો.

ચૂંટણી પંચને નિર્દેશ આપવામાં આવ્યો છે કે આ યાદી બૂથવાર બનાવવામાં આવે, જેથી મતદારો EPIC નંબર (મતદાર ફોટો ઓળખ કાર્ડ નંબર) દ્વારા પોતાનું નામ સરળતાથી ચકાસી શકે. જો કોઈ મતદારનું નામ યાદીમાં ન હોય તો તેનું કારણ સ્પષ્ટપણે દર્શાવવામાં આવે.

કોર્ટે આદેશ કર્યો છે કે, આ સાથે મતદારોને આધાર કાર્ડની નકલ જોડીને પોતાનો દાવો રજૂ કરવાની સુવિધા પણ પૂરી પાડવામાં આવે.

આ માહિતી જિલ્લાની વેબસાઈટ ઉપરાંત સ્થાનિક મીડિયા અને સત્તાવાર સોશિયલ મીડિયા ચેનલો પર પણ વ્યાપકપણે પ્રસારિત કરવામાં આવશે. આ પગલાથી લોકો પોતાના નામની સ્થિતિ વિશે સરળતાથી જાણી શકશે અને લોકશાહી પ્રક્રિયામાં પારદર્શિતા વધશે.

દરેક બૂથ લેવલ ઓફિસર (BLO) દ્વારા ચૂકી ગયેલા નામોની યાદી પંચાયત ભવન અને બ્લોક ઓફિસમાં લગાવવામાં આવે. તેમાં નામ ન હોવાનું કારણ પણ સ્પષ્ટ રીતે દર્શાવવામાં આવે. આ ઉપરાંત જિલ્લાવાર યાદી રાજ્યના મુખ્ય ચૂંટણી કમિશનરની વેબસાઈટ પર પણ અપલોડ કરવામાં આવે.

આ આદેશોનું પાલન સુનિશ્ચિત કરવા માટે દરેક બૂથ લેવલ અને જિલ્લા કક્ષાના અધિકારીઓ પાસેથી પાલન અહેવાલ મંગાવીને સુપ્રીમ કોર્ટને જાણ કરવામાં આવશે. આ કેસની આગામી સુનાવણી 22 ઓગસ્ટે થશે.

આ પગલાં દ્વારા મતદારો સરળતાથી પોતાનું નામ ચકાસી શકશે અને કોઈપણ મુશ્કેલી વગર મતદાન કરી શકશે.

English summary

Supreme Court Orders Election Commission on 65 Lakh Missing Voter Names in Bihar