બિહારને વિશેષ દરજ્જો અપાવવા નીતિશની અધિકાર યાત્રા

Updated: Sunday, November 4, 2012, 14:28 [IST]

પટના, 4 નવેમ્બર : આજે બિહારમાં સત્તારૂઢ જનતાદળ (યુ)ની બિહારને વિશેષ રાજ્યનો દરજ્જો આપવાની માંગણીને લઇને પટનાના ઐતિહાસિક ગાંધી મેદાનમાં અધિકાર રેલીનું આયોજન કરવામાં આવ્યું છે. આ રેલીમાં ભાગ લેવા માટે રાજ્યના વિવિધ પ્રદેશોમાંથી લોકો પટના પહોંચ્યા છે.

આ રેલીમાં બિહારના મુખ્યમંત્રી નીતિશ કુમાર પહોંચી ગયા છે. જેમાં નીતિશ કુમાર બિહારના લોકોનું સમર્થન મેળવીને કેન્દ્ર સરકાર પર રાજ્યને વિશેષ દરજ્જો આપવા દબાણ કરશે. આ દરજ્જાથી રાજ્યના આર્થિક વિકાસ માટે વિશેષ ફંડ મેળવવાનો પ્રયાસ કરવામાં આવશે.

આ રેલી માટે ગાંધી મેદાનમાં 150 ફૂટ લાંબુ અને 40 ફૂટ પહોળું મંચ ઉભું કરાયું છે. આ અંગે જદયુ નેતા સંજય ઝાએ જણાવ્યું કે "આ રેલી સવારે 10થી બપોરના ત્રણ વાગ્યા સુધી યોજાશે. તેનું ઇન્ટરનેટ પર સીધું પ્રસારણ કરવામાં આવશે."