કુતરાએ 14 વર્ષની છોકરીને બચાવી બળાત્કારીઓના ચુંગલમાંથી

એક પાલતુ કુતરાએ 14 વર્ષની કિશોરીને બળાત્કારીઓથી બચાવી હતી. છોકરીને બચાવવા કુતરો હવસખોરો સામે ભીડ્યો હતો.

થોડા દિવસ પહેલા એક વીડિયો વાયરલ થયો હતો જેમાં લૂંટનો ભોગ બનેલી દાદીની મદદ માટે કુતરાં દોડી આવ્યાં હતાં. વધુ આવો જ એક કિસ્સો સામે આવ્યો છે. આ ઘટના મધ્ય પ્રદેશની છે જ્યાં એક પાલતુ કુતરાએ 14 વર્ષની કિશોરીને બળાત્કારીઓથી બચાવી હતી. છોકરીને બચાવવા કુતરો હવસખોરો સામે ભીડી ગયો હતો. નરાધમોએ કુતરા પર હુમલો પણ કર્યો હતો છતાં કુતરો પાછળ ન હટ્યો. આખરે આરોપીઓએ ઘટના સ્થળેથી ભાગવું પડ્યું હતું. તે સમયે પણ કુતરાએ તેમનો પીછો નહોતો છોડ્યો. ભાગતી વખતે કુતરો બેમાંથી એક આરોપીને ખરાબ રીતે કરડ્યો હતો. આ મામલે પોલીસને સૂચના આપી દેવામાં આવી હતી.

કુતરાએ 14 વર્ષની છોકરીને બચાવી

આ સમગ્ર મામલો મધ્ય પ્રદેશના સાગર જિલ્લાનો છે. મોતીનગર પોલીસ સ્ટેશનના ઈન્સપેક્ટર વિપિન તામ્રકરે જણાવ્યું કે આ ઘટના શનિવાર રાતની છે. એમણે જણાવ્યું કે 14 વર્ષની પીડિતા શનિવારે સાંજે કોઈ કામથી ઘરની બહાર નીકળી હતી. આ દરમિયાન એશૂ અહિરવાર (39) અને પુનીત અહિરવારે (24) પીડિતાને ચાકુની નોક પર બંધક બનાવી તેને અવાવરુ જગ્યાએ લઈ ગયા હતા. જ્યાં કથિત રીતે બંને આરોપીઓે પીડિતા સાથે દુષ્કર્મ આચર્યું હતું.

બળાત્કારીઓએ કુતરા પર કર્યો હુમલો

જો કે પીડિતા સતત આરોપીઓનો વિરોધ કરી રહી હતી, પીડિતાની ચીસ સાંભળીને પાળતુ કુતરો ઘટના સ્થળે પહોંચી ગયો હતો. કુતરાએ બંને આરોપીઓ પર હુમલો કરી દીધો હતો. કુતરાને ભગાડવા તેમણે શક્ય તમામ પ્રયત્નો કર્યા. આરોપીઓએ કુતરા પર ધારદાર હથિયાર વડે હુમલો પણ કર્યો છતાં કુતરો પાછળ ન હટ્યો.

પોલીસે આરોપીઓની ધરપકડ કરી

જોતજોતામાં જ ત્યાં લોકો એકઠા થવા લાગ્યા હતા. આજુ-બાજુમાં રહેતા સ્થાનિક લોકોને આવતા જોઈ આરોપીઓ ત્યાંથી ભાગવા લાગ્યા, પરંતુ કુતરાએ એમનો પીછો ન છોડ્યો અને એમને કેટલીય જગ્યાએ કરડી પણ ખાધુ. બાદમાં રવિવારે પીડિતાના પરિવારે આ મામલે ફરિયાદ દાખલ કરાવી હતી. પોલીસે બંને આરોપીઓની ધરપકડ કરી તેમની વિરુદ્ધ પોક્સો એક્ટ અંતર્ગત કેસ નોંધ્યો. મેડિકલ ચેકઅપ દ્વારા છોકરી પર રેપ થયો હોવાની પુષ્ટિ થઈ છે.

English summary

dog fought with rapists to save a minor girl, 2 arrested.