Delhi Lok Sabha Election 2024: મતદાન કરો અને ડિસ્કાઉન્ટ મેળવો, મતદાન જાગૃતિ માટે અનોખી પહેલ

Delhi Lok Sabha Election 2024: લોકસભા ચૂંટણીના છઠ્ઠા તબક્કામાં દિલ્હીની સાત સંસદીય બેઠકો માટે કડક સુરક્ષા વ્યવસ્થા વચ્ચે શનિવારે સવારથી મતદાન ચાલી રહ્યું છે. દિલ્હીમાં વધુને વધુ લોકો મતદાન કરે તે સુનિશ્ચિત કરવા માટે કનોટ પ્લેસના ટ્રેડર્સ એસોસિએશને એક ખાસ પહેલ શરૂ કરી છે.

આ અંતર્ગત જે લોકો મતદાન કરી રહ્યા છે, તેમને ખરીદી પર ડિસ્કાઉન્ટ આપવામાં આવી રહ્યું છે. જો તમે વોટિંગ કર્યા પછી અહીં ખરીદી કરવા અથવા ખાવા માટે જાઓ છો, તો તમને 15 થી 38 ટકાનું ડિસ્કાઉન્ટ મળશે. લગભગ 50 દુકાનો આ ડિસ્કાઉન્ટ આપી રહી છે.

ગરમીને જોતા મતદારો માટે પુરતી વ્યવસ્થા - હવામાન વિભાગે દિવસ માટે યલો એલર્ટ જાહેર કરી છે, અને મહત્તમ તાપમાન 44 ડિગ્રી સેલ્સિયસ સુધી પહોંચવાની આગાહી કરી છે. ચૂંટણી વિભાગે ગરમીને જોતા મતદારો માટે પુરતી વ્યવસ્થા કરી છે. સવારે સાત વાગ્યાથી મતદાન શરૂ થાય તે પહેલા જ લોકો મતદાન મથકોની બહાર કતારોમાં ઉભા જોવા મળ્યા હતા.

અધિકારીએ જણાવ્યું કે, કુલ 1.52 કરોડ મતદારો, જેમાં 82 લાખ પુરૂષો, 69 લાખ મહિલાઓ અને 1,228 ટ્રાન્સજેન્ડરનો સમાવેશ થાય છે, તેઓ સાત મતવિસ્તારના 13,000થી વધુ મતદાન મથકો પર મતદાન કરવા માટે પાત્ર છે. આ વખતે શહેરમાં 2.52 લાખથી વધુ મતદારો છે, જેઓ પ્રથમ વખત મતદાન કરશે.

આ ઉમેદવારો મેદાનમાં છે - આમ આદમી પાર્ટી (AAP) એ પૂર્વ દિલ્હી બેઠક પરથી કુલદીપ કુમાર, પશ્ચિમ દિલ્હીથી મહાબલ મિશ્રા, નવી દિલ્હીથી સોમનાથ ભારતી અને દક્ષિણ દિલ્હીથી સાહી રામ પહેલવાનને મેદાનમાં ઉતાર્યા છે. કોંગ્રેસે ચાંદની ચોક બેઠક પરથી જેપી અગ્રવાલ, ઉત્તર પૂર્વ દિલ્હીથી કન્હૈયા કુમાર અને ઉત્તર પશ્ચિમ દિલ્હી બેઠક પરથી ઉદિત રાજને ઉમેદવાર બનાવ્યા છે.

ભાજપે નોર્થ ઈસ્ટ દિલ્હીથી મનોજ તિવારીને પોતાના ઉમેદવાર બનાવ્યા છે. તેઓ દિલ્હીના એકમાત્ર વર્તમાન સાંસદ છે, જેમને પાર્ટીએ ફરીથી મેદાનમાં ઉતાર્યા છે. આ ઉપરાંત પાર્ટીએ દક્ષિણ દિલ્હીથી રામવીર સિંહ બિધુરી, નવી દિલ્હીથી બાંસુરી સ્વરાજ, પૂર્વ દિલ્હીથી હર્ષ દીપ મલ્હોત્રા, ઉત્તર પશ્ચિમ દિલ્હીથી યોગેન્દ્ર ચંદોલિયા, ચાંદની ચોકથી પ્રવીણ ખંડેલવાલ અને પશ્ચિમ દિલ્હીથી કમલજીત સેહરાવતને ઉમેદવાર બનાવ્યા છે.

આમ આદમી પાર્ટી (AAP) અને કોંગ્રેસ, વિપક્ષી ઈન્ડિયા ગઠબંધન (ઈન્ડિયન નેશનલ ડેવલપમેન્ટલ ઈન્ક્લુઝિવ એલાયન્સ) ના સહયોગી, દિલ્હીમાં સાથે ચૂંટણી લડી રહ્યા છે. સીટ શેરિંગ સિસ્ટમ હેઠળ AAP ચાર સીટો પર અને કોંગ્રેસ ત્રણ સીટો પર ચૂંટણી લડી રહી છે. દિલ્હીમાં આ પહેલી લોકસભા ચૂંટણી છે, જેમાં AAP અને કોંગ્રેસે ભાજપ સામે સંયુક્ત ઉમેદવારો ઉભા રાખ્યા છે.

English summary

Delhi Lok Sabha Election 2024: Vote and Get Discount, Know Unique Voting Awareness Initiative