Cyclone Biparjoy : ગુજરાત બાદ રાજસ્થાનમાં તબાહી મચાવી શકે છે વાવાઝોડુ બિપરજોય, 5 જિલ્લામાં રેડ એલર્ટ

અરબ સાગરમાંથી ધરતી પર પગ મુકીને હવે વાવાઝોડુ ગુજરાતને ધમરોળીને રાજસ્થાન તરફ આગળ વધી રહ્યુ છે. હવામાન વિભાગ અનુસાર, વાવાઝોડુ રાજસ્થાનમાં પણ વિનાશ વેરી શકે છે. એટલે જ હવામાન વિભાગે 5 જિલ્લામાં એલર્ટ જારી કર્યુ છે.

સામે આવી રહેલા સમાચારો અનુસાર, આ વાવાઝોડાની અસર રાજસ્થાનમાં પણ જોવા મળી શકે છે અને ભારે વરસાદને લઈને રેડ એલર્ટ જાહેર કરવામાં આવ્યું છે.

હવામાન વિભાગ અનુસાર, ચક્રવાત બિપરજોય આગામી 48 કલાકમાં રાજસ્થાનમાં પ્રવેશી શકે છે અને જે સમયે તે અહીં પ્રવેશ કરશે ત્યાં ભારે વાવાઝોડાની સંભાવના છે. હવામાન વિભાગે બાડમેર, જોધપુર, જાલોર, નાગૌર અને પાલી જિલ્લામાં રેડ એલર્ટ જારી કરાયુ છે.

હવામાન વિભાગની ધારણા અનુસાર, અહીં 150 થી 250 મીમી સુધી વરસાદ પડી શકે છે. હાલ સુરક્ષાની તમામ વ્યવસ્થા કરવામાં આવી છે. રાજ્યમાં વાવાઝોડાની શરૂઆતી અસર દેખાવા લાગી છે અને કેટલાક સ્થળોએ હળવો વરસાદ પણ જોવા મળી રહ્યો છે.

આ પાંચ જિલ્લાઓ ઉપરાંત રાજ્યના 16 જિલ્લાઓમાં વરસાદ માટે ઓરેન્જ એલર્ટ જારી કરવામાં આવ્યું છે અને 75 કિમીની ઝડપે પવન ફૂંકાય તેવી શક્યતા છે. હવામાન વિભાગે જણાવ્યુ છે કે, રાજસ્થાનમાં 15 થી 17 જૂન દરમિયાન હવામાન ખરાબ રહેશે. લોકોને એલર્ટ રહેવા કહેવાયુ છે.

અહીં તમને જણાવી દઈએ કે, હાલ ચક્રવાત બિપરજોય ગુજરાતના જખૌ પાસે દરિયા કિનારા સાથે ટકરાયુ છે અને લેન્ડફોલ ચાલી રહ્યુ છે. આ લેન્ડફોલ મોડી રાત સુધી ચાલશે અને ત્યારબાદ ગુજરાતને પાર કરીને રાજસ્થાન તરફ આગળ વધશે.

English summary

Cyclone Biparjoy: After Gujarat, Cyclone Biparjoy may wreak havoc in Rajasthan