Bihar Bridge Collapse: બિહારમાં ધડાધડ તૂટી રહ્યા છે પુલ, 17 દિવસમાં 12 બ્રીજ ધરાશાયી

Bihar Bridge Collapse News: બિહારમાં ચોમાસાના આગમનની સાથે જ એક પછી એક પુલ તૂટી રહ્યા છે. બિહારમાં છેલ્લા 17 દિવસમાં ઓછામાં ઓછા 12 પુલ ધરાશાયી થયા છે. જેના કારણે નીતિશ કુમારની આગેવાનીવાળી સરકાર ઈન્ફ્રાસ્ટ્રક્ચરની સુરક્ષા અને જાળવણીને લઈને વિપક્ષની આકરી ટીકાનો સામનો કરી રહી છે.

સિવાન, સારણ, મધુબની, અરરિયા, પૂર્વ ચંપારણ અને કિશનગંજ જિલ્લામાંથી પુલ તૂટી પડવાની ઘટનાઓ નોંધાઈ છે. બિહારમાં પુલ તૂટી પડવાની ઘટનાઓ વચ્ચે કેન્દ્રીય મંત્રી અને રાજ્યના પૂર્વ મુખ્યમંત્રી જીતન રામ માંઝીએ આ ઘટનાઓ માટે ચોમાસાની શરૂઆત અને ત્યારબાદ ભારે વરસાદને જવાબદાર ગણાવ્યો છે.

માંઝીએ કહ્યું, "આ ચોમાસાનો સમય છે. ત્યાં અસાધારણ વરસાદ થયો છે, જેના કારણે પુલ તૂટી રહ્યા છે." જીતન રામ માંઝીએ કહ્યું, "પરંતુ, રાજ્યના મુખ્યમંત્રી નીતિશ કુમાર તપાસ પ્રત્યે ખૂબ જ સંવેદનશીલ છે. તેમણે ગઈકાલે એક બેઠક યોજી હતી અને કડક સૂચના આપી હતી કે કોઈપણ પ્રકારની બેદરકારી સામે કડક કાર્યવાહી કરવામાં આવે."

નીતિશ કુમારે માર્ગ બાંધકામ વિભાગ (RCD) અને ગ્રામીણ બાંધકામ વિભાગ (RWD) ને રાજ્યના તમામ જૂના પુલોનું તાત્કાલિક સર્વેક્ષણ કરવા અને તે પુલોને ઓળખવા માટે નિર્દેશ આપ્યો કે જેને તાત્કાલિક સમારકામની જરૂર છે.

જળ સંસાધન વિભાગના અધિક મુખ્ય સચિવે પુલ તૂટી પડવાની ઘટનાઓ માટે જવાબદાર તરીકે તાજેતરના ડિસિલ્ટીંગના પ્રયાસોમાં સામેલ એન્જિનિયરો અને કોન્ટ્રાક્ટરોની સંભવિત ભૂલોને ઓળખી કાઢ્યા છે. "આમાંના મોટાભાગના પુલ 30 વર્ષ જૂના હતા અને છીછરા પાયા ધરાવતા હતા. આ પાયા ડિસિલ્ટિંગ દરમિયાન નાશ પામ્યા હતા. પ્રાથમિક દૃષ્ટિએ સંબંધિત એન્જિનિયરોની ભૂલ હોવાનું જણાય છે તેમ અધિકારીએ જણાવ્યું હતું.

પુલ તૂટી પડવાના કારણોની ચર્ચા કરીએ તો તેની પાછળ ઘણા કારણો છે. જેમાં ડિઝાઈન, બ્રિજ બનાવવામાં નબળું મટિરિયલ વપરાવું, બેદરકારી, બ્રિજનું સમયસર ઓડિટ ન થવું વગેરેનો સમાવેશ થાય છે. આ સિવાય ક્યારેક કુદરતી આફત કે ગંભીર પૂર જેવી પરિસ્થિતિમાં પણ પુલ તૂટી પડે છે.

રિપોર્ટ અનુસાર, પુલ પડવાની 80 ટકા ઘટનાઓ કુદરતી આફતોને કારણે થાય છે. તે જ સમયે, બાંધકામમાં ઉપયોગમાં લેવાતા નબળા મટિરિયલને કારણે 10 ટકા પુલ તૂટી પડવાના બનાવો બને છે. જ્યારે 3.28 ટકા બ્રિજ ઓવરલોડિંગ અને 2.19 ટકા માનવ સર્જિત આફતોને કારણે છે.