છેલ્લા 24 કલાકમાં 121 તાલુકામાં કમોસમી વરસાદ, જાણો સૌથી વધુ ક્યાં?

ગુજરાતમાં ઉનાળાની શરૂઆત થઈ ચૂકી છે, ત્યારે રાજ્યનું હવામાન અચાનક બદલાયું છે. છેલ્લા 24 કલાક દરમિયાન વાતાવરણમાં આવેલા મોટા પલટાને કારણે અનેક વિસ્તારોમાં ગાજવીજ સાથે વરસાદ નોંધાયો છે.

રાજ્યભરમાં કુલ 121 તાલુકાઓમાં કમોસમી વરસાદ પડ્યો છે. ખાસ કરીને અમરેલીના બગસરા અને સુરેન્દ્રનગરના ચોટિલામાં પોણા બે ઇંચ જેટલા ભારે વરસાદથી રસ્તાઓ પર પાણી ભરાઈ ગયા હતા, જેના કારણે જનજીવન પર અસર જોવા મળી હતી.

સૌરાષ્ટ્રના રાજકોટ, જામનગર, ભાવનગર અને જૂનાગઢ જિલ્લામાં પણ વરસાદી વાતાવરણ છવાયું હતું. આ ઉપરાંત, ઉત્તર ગુજરાતના બનાસકાંઠા, પાટણ અને મહેસાણા પંથકમાં પણ મેઘમહેર જોવા મળી હતી.

મધ્ય ગુજરાતના ખેડા અને આણંદ જિલ્લાના કેટલાક ભાગોમાં પણ વરસાદી ઝાપટા પડ્યા હતા. આ અણધાર્યા વરસાદે લોકોને એકસાથે ગરમી, ઠંડી અને વરસાદ એમ ત્રણ ઋતુઓનો અનોખો અનુભવ કરાવ્યો છે.

આ કમોસમી વરસાદને કારણે જીરું, વરિયાળી અને રાયડા જેવા ઊભા પાકને ભારે નુકસાન થવાની ભીતિ સેવાઈ રહી છે. માર્કેટિંગ યાર્ડમાં ખુલ્લામાં રાખવામાં આવેલો ખેડૂતોનો તૈયાર માલ પલળી જવાથી તેમની ચિંતામાં વધારો થયો છે.

હવામાન વિભાગના જણાવ્યા અનુસાર, 'વેસ્ટર્ન ડિસ્ટર્બન્સ' સક્રિય થવાને કારણે વાતાવરણમાં આ ફેરફાર જોવા મળ્યો છે. આગામી દિવસોમાં પણ રાજ્યમાં વાદળછાયું વાતાવરણ જળવાઈ રહેવાની શક્યતાઓ વર્તાઈ રહી છે.

English summary

Unseasonal rains in Gujarat affect weather across multiple districts, posing threats to standing crops and disrupting markets and transport. The variability underscores climate sensitivity and the need for farmer preparedness and timely advisories.