રબારી સમાજના નવા બંધારણની જાહેરાત, ખોટા ખર્ચાઓ પર લાગશે પ્રતિબંધ

By Desk

Updated: Sunday, January 25, 2026, 17:12 [IST]

ગુજરાતના રબારી સમાજ દ્વારા સામાજિક સુધારા માટે ડીસા ખાતે એક વિશાળ મહાસંમેલન યોજવામાં આવ્યું હતું. આ સંમેલનમાં સમાજના આગેવાનોએ દેખાડો અને ખોટા ખર્ચ અટકાવવા ૧૧ મુદ્દાનું નવું બંધારણ જાહેર કર્યું છે.

આ નવી પહેલનો મુખ્ય હેતુ મધ્યમ વર્ગના પરિવારોને આર્થિક બોજમાંથી મુક્ત કરવાનો અને શિક્ષણને પ્રોત્સાહન આપવાનો છે. સમાજમાં સમાનતા લાવવા માટે હવેથી પ્રસંગોમાં થતા બેફામ ખર્ચાઓ પર કડક નિયંત્રણો લાદવામાં આવ્યા છે.

લગ્ન પ્રસંગોમાં હવે પ્રિ-વેડિંગ શૂટ, હલ્દી અને મહેંદી જેવા ખર્ચાળ કાર્યક્રમો પર સદંતર પ્રતિબંધ મૂકવામાં આવ્યો છે. જમણવારમાં મર્યાદિત વાનગીઓ રાખવા અને ડીજે કે વરઘોડાને બદલે સાદાઈથી પ્રસંગ ઉજવવા અપીલ કરાઈ છે.

સોશિયલ મીડિયાના વળગણને દૂર કરવા લગ્નની રીલ બનાવવા કે ફોટા જાહેર કરવા પર મનાઈ ફરમાવવામાં આવી છે. લગ્નમાં અપાતી વાસણ પ્રથા બંધ કરી તેના બદલે રોકડ રકમ આપવાનો મહત્વનો નિર્ણય પણ લેવામાં આવ્યો છે.

સગાઈ અને આણા પ્રથામાં પણ મોટા સુધારા કરતા મહેમાનોની સંખ્યા અને ભેટ-સોગાદોની મર્યાદા નક્કી કરવામાં આવી છે. દીકરીના શિક્ષણ માટે દરેક પ્રસંગે શૈક્ષણિક સંકુલમાં ફરજિયાત દાન આપવાની પરંપરા શરૂ કરવામાં આવશે.

જન્મ અને સીમંત પ્રસંગોમાં પણ બેબી શાવર જેવા પશ્ચિમી રિવાજો ત્યાગી જૂની પરંપરા મુજબ સાદાઈ રાખવી પડશે. હોસ્પિટલ કે પ્રસૂતિ વખતે સગા-વ્હાલાઓ વચ્ચે થતી નાણાકીય લેવડ-દેવડમાં પણ ચોક્કસ મર્યાદા નક્કી કરાઈ છે.

મરણ પ્રસંગે થતા જમણવાર અને ખોટા લોકાચાર બંધ કરીને શોક સભામાં સાદગી જાળવવા સૂચના અપાઈ છે. વ્યસનમુક્ત સમાજ બનાવવા માટે અફીણ અને અન્ય નશાકારક દ્રવ્યોના ઉપયોગ પર સંપૂર્ણ પ્રતિબંધ મૂકવામાં આવ્યો છે.

છૂટાછેડાના કિસ્સામાં બાળકોના ભવિષ્યને સુરક્ષિત કરવા માટે મોટી રકમની ફિક્સ્ડ ડિપોઝિટ (FD) કરવાનો નિયમ બનાવ્યો છે. કાયદાકીય વિવાદોને બદલે સામાજિક સ્તરે પંચ દ્વારા પ્રશ્નો ઉકેલવા પર વધુ ભાર મૂકવામાં આવ્યો છે.

આ બંધારણનો અમલ કરાવવા માટે દરેક તાલુકા અને ગામ સ્તરે અમલીકરણ સમિતિઓની રચના કરવામાં આવશે. રબારી સમાજના આ ક્રાંતિકારી પગલાને અન્ય સમાજો માટે પણ પ્રેરણારૂપ માનવામાં આવી રહ્યો છે.