Panchhotsav 2023: અધિકારીઓએ કર્યો 10 અલગ અલગ વર્લ્ડ હેરિટેજ સ્મારકોનો પગપાળા પ્રવાસ

Panchhotsav 2023: ચાલુ વર્ષ 2023માં પંચમહાલ જિલ્લાના હાલોલ તાલુકામાં પાવાગઢ-ચાંપાનેર વર્લ્ડ હેરિટેજ સાઇટ, વડા તળાવ ખાતે પંચમહોત્સવની ઉજવણીનો પ્રારંભ થઇ ચૂક્યો છે.

અલગ અલગ પ્રવૃત્તિઓ થકી આકર્ષણનું કેન્દ્ર બનેલા પંચમહોત્સવના પ્રથમ દિવસે નિવાસી અધિક જિલ્લા કલેક્ટર એમ. ડી. ચુડાસમા સહિતના અધિકારીઓ/કર્મચારીઓએ 10 અલગ અલગ વર્લ્ડ હેરિટેજ સ્મારકોનો પગપાળા પ્રવાસ કર્યો હતો.

સંગીત સંધ્યા પહેલા યોજાયેલા આ કાર્યક્રમમાં જાહેર જનતાને હેરિટેજ વૉકમાં જોડાવા અપીલ કરવામાં આવી હતી. આ સાથે ગુજરાતના અણમોલ સાંસ્કૃતિક વારસાના જતનનો સંદેશ આપવામાં આવ્યો હતો.

આ હેરિટેજ વૉકમાં કુલ 10 અલગ અલગ વર્લ્ડ હેરિટેજ સ્મારકો ખાતે પગપાળા યાત્રામાં પ્રવાસીઓ પણ સહભાગી થયા હતા. ઉપસ્થિતોને આ સ્મારકો અને તેના મહત્વ વિશે જાણકારી આપવામાં આવી હતી.

એક મિનાર મસ્જિદથી લઈને વડા તળાવ-ટેન્ટ સિટી સુધી કુલ 10 સ્થળો ખાતે અંદાજે 6 કિલોમીટરની રેન્જમાં હેલિકેલ વાવ, સકર ખાનની દરગાહ, સિટી ગેટ, શહેર કી મસ્જિદ, ચાંપાનેર વર્લ્ડ હેરિટેજ સાઈટ, જામી મસ્જિદ, ચાંપાનેર, કમાની મસ્જિદ, કબૂતર ખાના પેવેલિયન સહિતના ઐતિહાસિક સ્થળો ખાતે હેરિટેજ વૉકનો વિધિવત પ્રારંભ થઇ ચૂક્યો છે. ગાઈડની મદદથી પ્રવાસીઓને તમામ સ્મારકો અંગે અને સાંસ્કૃતિક વારસા અંગે માહિતી આપવામાં આવી રહી છે.

આ હેરિટેજ વૉકમાં નિવાસી અધિક જિલ્લા કલેક્ટર એમ. ડી. ચુડાસમા, હાલોલ પ્રાંત અધિકારી પ્રણવ વિઠ્ઠાણી, સ્ટેમ્પ ડ્યુટી કલેક્ટર ફાલ્ગુન પંચાલ, જિલ્લા ખેતીવાડી અધિકારી એમ. જી. પટેલ સહિત વિવિધ અધિકારીઓ/કર્મચારીઓ અને પ્રવાસીઓ જોડાયા હતા.

English summary

Panchhotsav 2023: Officials tour 10 different World Heritage sites on foot