RSSના નેતાઓ સાથે રાજકીય મુદ્દે ચર્ચા નથી થઇ : મોદી

Published: Sunday, October 21, 2012, 14:27 [IST]

નાગપુર, 21 ઑક્ટોબર : આજે નાગપુરમાં રાષ્ટ્રીય સ્વયં સેવક સંઘ (આરએસએસ)ના નેતાઓ સાથેની મુલાકાત બાદ ગુજરાતના મુખ્યમંત્રી નરેન્દ્ર મોદીએ એક નિવેદનમાં સંઘના નેતાઓ સાથે રાજકીય મુદ્દે કોઇ ચર્ચા નથી થઇ હોવાનું જણાવી વિવાદાસ્પદ મુદ્દાઓને પોતાની મુલાકાત સાથે જોડવાનું ટાળ્યું હતું.

આજે સવારે નાગપુરમાં આરએસએસના કાર્યાલય ખાતે નરેન્દ્ર મોદી પહોંચ્યા હતા. આ મુલાકાતમાં તેઓ સરસંઘચાલક મોહન ભાગવત, ભૈયાજી અને સુરેશ સોની જેવા અગ્રણી આગેવાનોને મળ્યા હતા. સંઘના આગેવાનો સાથે તેમણે લગભગ સાડા ત્રણ કલાક ચર્ચા કરી હતી.

આ મુલાકાત અંગે માનવામાં આવતું હતું કે નરેન્દ્ર મોદી આ બેઠકમાં ચૂંટણી મુદ્દે વિસ્તારથી ચર્ચા કરશે. આ ઉપરાંત ગયા સપ્તાહે સુરતમાં ભાજપના અગ્રણી નેતા સંજય જોશીએ લીધેલી મુલાતાક અને તેના કારણે શરૂ થયેલી ચર્ચાઓ સામે પોતાની નારાજગી પણ વ્યક્ત કરશે.

આ તમામ અટકળો પર પૂર્ણવિરામ મૂકતા નરેન્દ્ર મોદીએ જણાવ્યું હતું કે "હું સંઘનો કાર્યકર રહ્યો છું. આથી ઘણા સમયથી આગેવાનોને મળ્યો ન હતો. આ મુલાકાત આનંદદાયક રહી. અમે મનની ઘણી બધી વાતો કરી છે. પણ કોઇ રાજકીય મુદ્દે ચર્ચા કરી નથી."

Published On October 21, 2012