પરસેવો છોડાવતી ગરમી વચ્ચે માવઠાની આગાહી, ખેડૂતો ચિંતામાં

ગુજરાતમાં ઉનાળાની શરૂઆતમાં જ અસહ્ય ગરમીનો પ્રકોપ જોવા મળી રહ્યો છે, ત્યારે હવે વાતાવરણમાં મોટા પલટાની શક્યતા છે.

હવામાન વિભાગની આગાહી મુજબ, આગામી પાંચ દિવસમાં રાજ્યના તાપમાનમાં 2 થી 5 ડિગ્રી સુધીનો મોટો ઘટાડો નોંધાઈ શકે છે. વેસ્ટર્ન ડિસ્ટર્બન્સ સક્રિય થવાને કારણે રાજ્યના અનેક જિલ્લાઓમાં કમોસમી વરસાદ એટલે કે માવઠું પડવાની પૂરેપૂરી સંભાવના છે.

હવામાન નિષ્ણાત અંબાલાલ પટેલે પણ માર્ચ મહિનામાં માવઠાની આગાહી કરતા જગતના તાત ગણાતા ખેડૂતો ચિંતામાં મુકાયા છે. એક તરફ ગરમીથી લોકોને આંશિક રાહત મળશે, પરંતુ બીજી તરફ ભરઉનાળે વરસાદની સ્થિતિ સર્જાતા રવિ પાકને નુકસાનની ભીતિ છે.

ખાસ કરીને 20 માર્ચના રોજ ગીર સોમનાથ, મહીસાગર અને દાહોદ જેવા વિસ્તારોમાં ગાજવીજ સાથે હળવો વરસાદ પડી શકે છે.

વેસ્ટર્ન ડિસ્ટર્બન્સની અસરને પગલે 18 થી 20 માર્ચ દરમિયાન કચ્છ અને સૌરાષ્ટ્રના વિસ્તારોમાં વરસાદી માહોલ જામશે. બનાસકાંઠા, સાબરકાંઠા અને પાટણ સહિતના ઉત્તર ગુજરાતના જિલ્લાઓમાં પણ પવન સાથે હળવા વરસાદની ચેતવણી આપવામાં આવી છે.

આ સમયગાળા દરમિયાન 30 થી 40 કિલોમીટરની ઝડપે પવન ફૂંકાવાની શક્યતા હોવાથી ખેતીના પાકને પલળતો બચાવવા સૂચના અપાઈ છે.

અંબાલાલ પટેલના જણાવ્યા મુજબ, 14 થી 18 માર્ચ દરમિયાન સર્જાનાર સિસ્ટમની અસર છેક રાજસ્થાન સુધી જોવા મળવાની છે. રાજસ્થાનમાં સાયક્લોનિક સર્ક્યુલેશન સર્જાવાને કારણે ઉત્તર અને પૂર્વ ગુજરાતના ભાગોમાં વરસાદી ઝાપટાં પડવાની શક્યતા પ્રબળ છે.

ઈરાન અને ઈરાક તરફથી સક્રિય થનારી વરસાદી સિસ્ટમ વાયા રાજસ્થાન થઈને ગુજરાતના વાતાવરણમાં પલટો લાવશે તેમ મનાય છે.

આ પ્રી-મોન્સૂન એક્ટિવિટીને કારણે પવનની ગતિ તેજ રહેશે, જેના પરિણામે આંબા પરના મોર ખરી જવાની શક્યતા વધી ગઈ છે. ખેડૂતોએ પોતાના પાક અને APMCમાં રહેલા અનાજના જથ્થાને સુરક્ષિત સ્થળે ખસેડવા માટે વહીવટી તંત્ર દ્વારા સાવચેતીના પગલાં લેવાયા છે.

રાજ્યના મોટાભાગના જિલ્લાઓમાં આગામી સપ્તાહ દરમિયાન વાદળછાયું વાતાવરણ અને ગાજવીજ સાથે માવઠાની અસર વર્તાતી રહેશે.

English summary

Gujarat's weather outlook points to a dip in temperatures over the next five days and a likelihood of pre-monsoon rains. Officials warn of storm activity and gusty winds, advising farmers to protect crops and stored grains while maintaining vigilance across districts.