Gujarat rain : ગુજરાતમાં મેઘમહેર વચ્ચે 47 તાલુકામાં વરસાદ નોંધાયો, જાણો આગાહી

Gujarat rain : રાજ્યભરમાં હાલ વરસાદી માહોલ જામ્યો છે. આજે સાંજે 4 વાગ્યા સુધીમાં રાજ્યના 47 તાલુકાઓમાં વરસાદ નોંધાયો છે, જે દર્શાવે છે કે મેઘરાજા મન મૂકીને વરસી રહ્યા છે.

હવામાન વિભાગે આગામી સાત દિવસ સુધી હળવાથી મધ્યમ વરસાદ ચાલુ રહેવાની આગાહી કરી છે, જ્યારે 25 થી 28 જુલાઈ વચ્ચે રાજ્યના કેટલાક જિલ્લાઓમાં ભારે વરસાદ પડવાની પણ શક્યતા વ્યક્ત કરવામાં આવી છે.

આજે નોંધાયેલા વરસાદમાં સૌથી વધુ નવસારીના જલાલપોરમાં ત્રણ ઈંચ વરસાદ નોંધાયો છે. આ ઉપરાંત નવસારી તાલુકામાં સવા બે ઈંચ, મહિસાગરના કડાણામાં દોઢ ઈંચ, અને નવસારીના ગણદેવીમાં સવા ઈંચ વરસાદ પડ્યો છે.

હવામાન વિભાગ અનુસાર, 26 થી 28 જુલાઈ દરમિયાન ખાસ કરીને કચ્છ અને સૌરાષ્ટ્ર પ્રદેશમાં ભારે વરસાદની સંભાવના છે. આ ઉપરાંત અમદાવાદમાં પણ ગાજવીજ સાથે હળવાથી મધ્યમ વરસાદની આગાહી કરવામાં આવી છે.

વરસાદી સિસ્ટમ સક્રિય થવાને કારણે દરિયામાં ભારે પવન ફૂંકાવાની શક્યતા હોવાથી 23 થી 26 જુલાઈ સુધી માછીમારોને દરિયો ન ખેડવા સૂચના આપવામાં આવી છે.

હાલમાં એકસાથે ત્રણ વરસાદી સિસ્ટમ સક્રિય થઈ હોવાથી રાજ્યના ઘણા વિસ્તારોમાં વરસાદની સંભાવના વધી ગઈ છે. આ સિસ્ટમના કારણે આગામી દિવસોમાં ગુજરાતમાં સારો વરસાદ જોવા મળી શકે છે.

English summary

Gujarat Monsoon Mayhem: Heavy Rain Forecast, 47 Talukas Receive Downpour