ગુજરાત સરકારે 2027 વસ્તી ગણતરી માટે ઘરયાદીનું સમયપત્રક જાહેર

કેન્દ્ર સરકાર દ્વારા વસ્તી ગણતરી 2027 માટેની તૈયારીઓ તેજ કરી દેવામાં આવી છે. આ અંતર્ગત ગુજરાત સરકારે રાજ્યમાં હાઉસ લિસ્ટિંગ કામગીરી માટે સત્તાવાર જાહેરનામું બહાર પાડ્યું છે.

ભારતના રજિસ્ટ્રાર જનરલની કચેરી દ્વારા જારી કરાયેલા નોટિફિકેશન મુજબ આ કામગીરી થશે. દેશભરમાં 1 એપ્રિલથી 30 સપ્ટેમ્બર 2026 દરમિયાન હાઉસ લિસ્ટિંગનું કાર્ય પૂર્ણ કરવામાં આવશે.

ગુજરાત રાજ્યમાં આ પ્રક્રિયા માટે 20 એપ્રિલ થી 19 મે 2026 સુધીનો સમય નક્કી કરાયો છે. આ 30 દિવસના સમયગાળા દરમિયાન ઘરે-ઘરે જઈને વિગતો એકત્રિત કરવામાં આવશે.

હાઉસ લિસ્ટિંગની આ પ્રક્રિયા શરૂ થાય તે પહેલા નાગરિકોને સેલ્ફ-એન્યુમરેશનની સુવિધા પણ મળશે. આ માટે ઘર-ઘરની મુલાકાતના 15 દિવસ પહેલાનો સમયગાળો ફાળવવામાં આવ્યો છે.

સામાન્ય વહીવટ વિભાગ (પ્લાનિંગ) દ્વારા 2 ફેબ્રુઆરી 2026ના રોજ આ અંગે ગેઝેટ પ્રસિદ્ધ કરાયું છે. આ જાહેરાત બાદ હવે રાજ્યનું વહીવટી તંત્ર વસ્તી ગણતરીના આગામી તબક્કા માટે સજ્જ બન્યું છે.

English summary

The Gujarat government follows a central timetable for the 2027 census, outlining house-to-house operations and a preliminary self-enumeration period ahead of full deployment across states and union territories.