ગુજરાતમાં આજથી ધોરણ 10 અને 12ની બોર્ડ પરીક્ષાનો પ્રારંભ, 15 લાખથી વધુ વિદ્યાર્થીઓ આપશે એક્ઝામ

GSEB Board Exam 2026: ગુજરાત માધ્યમિક અને ઉચ્ચતર માધ્યમિક શિક્ષણ બોર્ડ (GSEB) દ્વારા આજથી રાજ્યભરમાં ધોરણ 10 અને 12ની બોર્ડ પરીક્ષાઓનો વિધિવત પ્રારંભ થઈ રહ્યો છે. આજથી શરૂ થતો આ વિદ્યામહાકુંભ આગામી 18 માર્ચ સુધી ચાલશે. પ્રથમ દિવસે ધોરણ 10ના વિદ્યાર્થીઓ ગુજરાતી વિષયનું પેપર આપશે.

પરીક્ષાના મહત્વના આંકડા

આ વર્ષે રેકોર્ડબ્રેક સંખ્યામાં વિદ્યાર્થીઓ પરીક્ષામાં નોંધાયા છે:

• કુલ વિદ્યાર્થીઓ: 15,27,724
• ધોરણ 10: 9,07,175 વિદ્યાર્થીઓ
• ધોરણ 12 (સામાન્ય પ્રવાહ): 5,01,286 વિદ્યાર્થીઓ
• ધોરણ 12 (વિજ્ઞાન પ્રવાહ): 1,19,263 વિદ્યાર્થીઓ
• દિવ્યાંગ વિદ્યાર્થીઓ: 7,363
• પરીક્ષા કેન્દ્રો: રાજ્યના 5,500 જેટલા બિલ્ડિંગોમાં બેઠક વ્યવસ્થા કરવામાં આવી છે.

પેપર લીક રોકવા 'PATA' ટેકનોલોજીનો ઉપયોગ

બોર્ડ દ્વારા પરીક્ષાની પારદર્શિતા જાળવવા માટે આધુનિક ટેકનોલોજીનો સહારો લેવામાં આવ્યો છે. પ્રશ્નપત્રોની સુરક્ષા માટે 'PATA' (Paper Box Authentication and Tracking Application) દ્વારા દરેક બોક્સનું ટ્રેકિંગ કરવામાં આવશે. આ ઉપરાંત, સંવેદનશીલ કેન્દ્રો પર દેખરેખ રાખવા માટે બોર્ડની 70 જેટલી ફ્લાઈંગ સ્ક્વોડ તૈનાત કરવામાં આવી છે.

આ વખતે શું નવું છે?

શિક્ષણ બોર્ડ દ્વારા આ વર્ષે કેટલાક મહત્વના ફેરફારો અને સાવચેતીના પગલાં લેવામાં આવ્યા છે:

• QR કોડ સિસ્ટમ: વિદ્યાર્થીઓના ગુણપત્રકમાં આ વખતે QR કોડ હશે, જેથી વેરિફિકેશન પ્રક્રિયા અત્યંત સરળ અને સુરક્ષિત બનશે.
• ખાસ SOP: બોમ્બની ધમકી કે અન્ય અઘટિત ઘટનાઓ સંદર્ભે ખાસ સ્ટાન્ડર્ડ ઓપરેટિંગ પ્રોસિજર (SOP) જાહેર કરવામાં આવી છે. કોઈ પણ ધમકીના કિસ્સામાં કેન્દ્ર સંચાલકોએ પોલીસ સાથે સંકલન કરી નિર્ણય લેવાનો રહેશે.
• ટ્રાફિક સહાય: જો કોઈ વિદ્યાર્થી ટ્રાફિકમાં ફસાય તો પોલીસ તેમને પરીક્ષા કેન્દ્ર સુધી પહોંચાડવામાં મદદ કરશે.

બોર્ડ સચિવની અપીલ

શિક્ષણ બોર્ડના સચિવે વિદ્યાર્થીઓને સંદેશ આપતા જણાવ્યું છે કે, તમામ આયોજન પૂર્ણ કરી લેવામાં આવ્યું છે. એસટી વિભાગ, રિક્ષા એસોસિએશન અને પોલીસ વિભાગ સાથે સંકલન સાધવામાં આવ્યું છે જેથી વિદ્યાર્થીઓને કેન્દ્ર સુધી પહોંચવામાં તકલીફ ન પડે. તેમણે તમામ વિદ્યાર્થીઓને કોઈપણ પ્રકારના ડર વગર, 'નિર્ભય થઈને પરીક્ષા આપવા' અપીલ કરી છે.

English summary

Gujarat Board Exams 2026 Begin Today: 15.27 Lakh SSC & HSC Students to Appear; PATA App for Paper Tracking and QR Codes on Marksheets