શું..? હવે ઉમરાવ જાન પણ કરશે આયટમ સૉંગ

Updated: Thursday, January 24, 2013, 12:26 [IST]

મુંબઈ, 24 જાન્યુઆરી : ચોંકી ગયા? ચોંકવાની જરૂર નથી. શીર્ષક એક દમ યોગ્ય જ છે. સૌંદર્ય મૂર્તિ રેખા મૅડમ હવે આયટમ નંબર જેવો કામોત્તેજક ડાંસ કરનાર છે. હકીકતમાં એક ફિલ્મ આવી રહી છે સુપર નાની. તેમાં રેખા સુપર નાનીના રોલમાં જ છે.

ઇન્દ્ર કુમાર દિગ્દર્શિત સુપર નાની ફિલ્મમાં રેખા સુપર નાની બન્યાં છે શરમન જોશીના, પરંતુ શરમનના આ નાની પીઢ નહીં, પણ ખૂબ હૉટ અને બિંદાસ્ત છે. તેથી તેને લટકાં-ઝટકાં પણ આવવા જોઇએ. એટલા માટે જ રેખા સુપર નાની ફિલ્મમાં આયટમ નંબર જેવો ડાંસ કરતાં નજરે પડશે. જોકે આ આયટમ સૉંગમાં ગ્લૅમર તો હશે, પણ અશ્લીલતા નહીં હોય. આયટમ સૉંગમાં મસ્તીનો મસાલો પણ હશે. આ ગીત કોરિયોગ્રાફ કરી રહ્યાં છે શબીના ખાન કે જેઓ આ ગીત 25મી જાન્યુઆરીના રોજ શુટ કરશે. ફિલ્મ મહિલા સશક્તીકરણ ઉપર આધારિત છે કે જેમાં નાની અને તેના દોહિત્ર વચ્ચે મધુર સંબંધો દર્શાવાયાં છે.

નોંધનીય છે કે આ અગાઉ બૉલીવુડના ઉમરાવ જાને ફિલ્મ પરિણીતામાં કૅબરે ડાંસ કર્યો હતો. તેમાં કોઈ શંકા નથી કે રેખા એક બહેતરીનડાંસર છે અને તેમની ઉપર ઉંમર હાવી નથી. લાંબા ગાળા બાદ રેખા કોઈ હિન્દી ફિલ્મમાં દેખાનાર છે. આજે પણ લોકો તેમની આંખોની મસ્તીના દીવાના છે, તેમના હુશ્નના વખાણ કરે છે. એ જોવું રસપ્રદ રહેશે કે 70 વર્ષીય અમિતાભ બચ્ચની જેમ 58 વર્ષીય રેખા પણ ફરી એક વાર પોતાના લટકાં-ઝટકાં દ્વારા લોકોને પોતાનું ઘેલુ લગાડવામાં સફળ થાય છે કે કેમ? હાલ તો લોકોને આ ફિલ્મનો ઇંતેજાર છે.