Birthday Special : વાંચો દિલીપ-સાયરાની લવ-સ્ટોરી

Updated: Wednesday, December 11, 2013, 10:57 [IST]

મુંબઈ, 11 ડિસેમ્બર : આજે ભારતીય સિનેમાના અભિનય સમ્રાટ અને ટ્રેજેડી કિંગ દિલીપ કુમારનો જન્મ દિવસ છે. ફિલ્મી સિતારાઓના આઇકૉન દિલીપ કુમાર આજે 91 વર્ષના થઈ ગયાં છે અને તેમની સાથે છેલ્લા 46 વર્ષોથી અર્ધાંગિનીનું સફળ જીવન વિતાવનાર સાયરાબાનુએ એક વખત પોતાના જીવન સાથે જોડાયેલ કેટલાંક રહસ્યોનો ખુલાસો કર્યો હતો.

સાયરાએ જણાવ્યું હતુ કે તેઓ જ્યારે માત્ર 12 વરસના હતાં, ત્યારે જ તેમને દિલીપ કુમાર સાથે પ્રેમ થઈ ગયો હતો. બેહિસાબ પ્રેમના દૃષ્ટાંત સાયરા-દિલીપને સામાન્ય રીતે દરેક ઇવેન્ટમાં સાથે-સાથે જોવામાં આવે છે. એટલુ જ નહીં, તાજેતરમાં જ્યારે દિલીપ કુમાર બીમાર પડ્યા હતાં, ત્યારે સાયરાબાનુ સતત 24 કલાક ખડેપગે તેમની સાથે રહ્યા હતાં. બૉલીવુડની આદર્શ જોડી ગણાતી દિલીપ-સાયરા આજે પણ એક દૃષ્ટાંત સમાન છે. દિલીપ કુમાર આઈસીયૂમાં દાખલ થયા હતાં અને આખા દેશે તેમના માટે દુઆઓ કરી હતી.

વીતેલા જમાનાના સુંદર તેમજ કામણગારી અભિનેત્રીઓમાંના એક સાયરાબાનુ કે જેઓ હાલ 69 વરસના છે તેમણે જ્યારે દિલીપ સાથે લગ્ન કર્યા હતાં, તો લોકોએ એલાન કર્યુ હતું કે ઉંમરના આ ભારે તફાવત ધરાવતાં લગ્ન લાંબા ટકી નહીં શકે, પરંતુ સાયરાએ તમામ ભવિષ્યવાણીઓ ખોટી પાડી દીધી. સાયરાની નજરે દિલીપ રીયલ હીરો છે કે જેઓ ખૂબ લવિંગ અને કૅરિંગ છે.

આવો આપને તસવીરોમાં બતાવીએ સાયરા-દિલીપની કેટલીક યાદગાર ફિલ્મો અને પળો.