‘પ્રેમ નામ હૈ મેરા’ : પ્રેમ ચોપરાની ઑયોબાયોગ્રાફી લૉન્ચ, જૂના જોગીઓ ઉમટ્યાં!

Published: Monday, April 14, 2014, 17:43 [IST]

મુંબઈ, 14 એપ્રિલ : બૉલીવુડના જાણીતા અભિનેતા પ્રેમ ચોપરાની ઑયોબાયોગ્રાફી તાજેતરમાં જ લૉન્ચ કરવામાં આવી. પ્રેમ ચોપરાની ઑટોબાયોગ્રાફીનું નામ છે પ્રેમ નામ હૈ મેરા. આ ઑટોબાયોગ્રાફી પ્રેમ ચોપરાની દીકરી રકિતા નંદા દ્વારા લખવામાં આવી છે. આ પુસ્તકમાં પ્રેમ ચોપરાની યંગ બૉયથી બૉલીવુડના મોટા સ્ટાર બનવા સુધીની યાદગાર સફર દર્શાવવામાં આવી છે.

પ્રેમ ચોપરાની આત્મકથાના લૉન્ચિંગ પ્રસંગે અનેક જૂના જોગીઓ પહોંચ્યા હતાં. તેમાં અમિતાભ બચ્ચન, મનોજ કુમાર, ઋષિ કપૂર, રાકેશ રોશન, રણધીર કપૂર, જિતેન્દ્ર, બોની કપૂરનો સમાવેશ થાય છે, તો અનિલ કપૂર, અક્ષય કુમાર, શરમન જોશી, રાજકુમાર હીરાણી, રાકેશ ઓમપ્રકાશ મહેરા જેવી હસ્તીઓએ પણ હાજરી આપી હતી.

આ પ્રસંગે પ્રેમ ચોપરા ખૂબ જ ખુશ નજરે પડતા હતાં. લૉન્ચિંગ ઇવેંટમાં પ્રેમ ચોપરાના પુત્રી રકિતા પણ તેમની સાથે હતાં. આ પ્રસંગે તમામ સેલિબ્રિટીઓએ પ્રેમ ચોપરા અને રકિતાને શુભેચ્છાઓ પાઠવી અને તેમની સાથે પોઝ આપ્યાં. પ્રેમ ચોપરાની ઑટોબાયોગ્રાફી લૉન્ચિંગ પ્રસંગે મનોજ કુમાર પ્રેમ ચોપરાના ગળામાં હાથ નાંખી તેમને અભિનંદન આપતા દેખાયાં.

નોંધનીય છે કે 23મી સપ્ટેમ્બર, 1935ના રોજ જન્મેલ પ્રેમ ચોપરાએ બૉલીવુડમાં પોતાની ખાસ ઓળખ એક વિલન તરીકે સ્થાપિત કરી હતી. તેમણે અનેક ફિલ્મોમાં વિલનની ભૂમિકાઓ ભજવી દર્શકોના દિલ જીત્યાં. આજે પણ બૉલીવુડના ટૉપ વિલન્સની વાત નિકળે છે, ત્યારે પ્રેમ ચોપરાનું નામ ચોક્કસ લેવામાં આવે છે. પ્રેમ ચોપરા દરેક ફિલ્મમાં ખાસ તકિયા કલામ માટે જાણીતા હતાં.

ચાલો જોઇએ પ્રેમ ચોપરાની ઑટોબાયોગ્રાફી લૉન્ચિંગ ઇવેંટની તસવીરી ઝલક :