મહારાષ્ટ્ર : LBT મુદ્દે 20 જૂનથી ઉગ્ર આંદોલનના અણસાર

Published: Thursday, June 6, 2013, 10:43 [IST]

મુંબઇ, 6 જૂન : મહારાષ્ટ્રમાં એલબીટી (લોકલ બોડી ટેક્સ)નો મુદ્દો ધીમી આંચે સળગી રહ્યો છે. એલબીટીનો વિરોધ કરી રહેલા વેપારીઓ સરકાર સાથે વાટાઘાટો કરી આ મુદ્દાનો વહેલીતકે ઉકેલ લાવવા ઇચ્છે છે. આ સાથે વેપારીઓએ એવો નિર્ણય પણ કર્યો છે કે આવનારા થોડા દિવસોમાં સરકાર તેમની સાથે આ મુદ્દે બેઠક નહીં યોજે તો 20 જૂનથી વેપારીઓ ઉગ્ર આંદોલન શરૂ કરશે.

મહારાષ્ટ્રમાં એલબીટીના વિરોધમાં 20 જૂનથી ઉગ્ર આંદોલન શરૂ કરવાનો નિર્ણય 5 જૂનના રોજ પૂનામાં મળેલી પૂના મર્ચન્ટ ચેમ્બરની બેઠકમાં લેવામાં આવ્યો હતો. આ બેઠકમાં વિવિધ સંગઠનોના 70થી વધારે પ્રતિનિધિઓએ હાજરી આપી હતી. આ વેપારી પ્રતિનિધિઓએ એલબીટીનો વિરોધ નોંધાવ્યો હતો અને એલબીટીનો સમાવેશ વૅટ (વેલ્યુ એડેડ ટેક્સ)માં કરવામાં આવે એવી રજૂઆત કરી હતી.

આ બાબતે આંદોલન થતાં મુખ્ય પ્રધાન પૃથ્વીરાજ ચવાણે સરકારી અધિકારીઓ અને વેપારીઓની એક સંયુક્ત કમિટી બનાવવાનું કહ્યું છે. એ માટે ફામ દ્વારા એના સભ્યોનાં નામ પણ આપી દેવામાં આવ્યાં છે, પણ કમિટી બન્યાનું GR હજી બહાર પાડ્યું નથી અને એની મીટિંગ કરી નથી. એથી આ બાબતે જલદી મીટિંગ લઈ નિર્ણય ન લેવાય તો 20 જૂનથી ફરી ઉગ્ર આંદોલન કરવાનો નિર્ણય ગઈ કાલની મીટિંગમાં વેપારીઓએ લીધો છે.

Published On June 6, 2013