રૂપિયો ગગડતા ડીઝલની કિંમતમાં રૂપિયા 5નો તોળાતો વધારો

નવી દિલ્હી, 27 ઓગસ્ટ : ભારતીય રૂપિયાએ આજે પણ યુએસ ડોલર સામે ગગડવાનું ચાલુ રાખ્યું હતું. આજે રૂપિયો 66ની સપાટી તોડીને રેકોર્ડબ્રેક તૂટતાં દેશમાં આર્થિક પરિસ્થિતિ ગંભીર બની ગઈ છે. ક્રુડ તેલનો આંતરરાષ્ટ્રીય ભાવ બેરલ દીઠ 110 ડોલર સુધી વધી ગયો છે અને સોનું10 ગ્રામ દીઠ રૂપિયા 32,500ની રેકોર્ડ સપાટીએ વધી ગયું છે. આ બધાને કારણે મોંઘવારીનો દર વધી શકે છે અને તેની સીધી અસર સામાન્ય માણસો પર પડશે.

સંસદનું ચોમાસું સત્ર આગામી 6 સપ્ટેંબરે પૂરું થશે તે પછી ડીઝલની કિંમતોમાં તોતિંગ ભાવવધારો આવી શકે છે. પેટ્રોલિયમ અને નેચરલ ગેસ મંત્રાલયના સૂત્રોનું કહેવું છે કે ડિઝલમાં લીટર દીઠ પાંચ રૂપિયા વધી શકે છે. મંત્રાલયનું માનવું છે કે ડિઝલમાં લીટરે ત્રણ રૂપિયાનો વધારો ઓછો અને અર્થહીન ગણાશે, કારણ કે ઓઈલ કંપનીઓ માટે હજી લીટરે 10 રૂપિયાની અન્ડર-રીકવરી છે.

બીજી બાજુ, રેલવે મંત્રાલય પણ ઓક્ટોબરમાં માલ-સામાન માટેના દરમાં વધારો કરે એવી ધારણા છે. જોકે ઉતારુ ભાડાને સ્પર્શ કરવાનો કોઈ વિચાર નથી. રેલવેએ છેલ્લે ગયા એપ્રિલમાં નૂરનાં દરમાં 5.7 ટકાનો વધારો કર્યો હતો.

English summary

Indian rupee slips; diesel price may hike by Rs 5