જેલમાં શ્રીસંત અને ચંડિલા વચ્ચે થઇ આક્ષેપબાજી અને મારામારી

નવી દિલ્હી, 27 મે : સ્પોટ ફિક્સીંગમાં ધરપકડ કરાયા બાદ પણ ક્રિકેટરો શ્રીસંત અને ચંદીલા પર ટૂ-20નો નશો ઉતર્યો હોય તેમ લાગતું નથી. જેલમાં બંને બે બે હાથ રમી લેવા માટે બેબાકળા બન્યા હતા. તેમણે જેલમાં ક્રિકેટ નહીં પણ મારા મારી કરીને હાથની સફાઇ કરવાનું મન બનાવ્યું હતું. જામીન ન મળતા ઉશ્કેરાયેલા શ્રીસંતે પોતાનો ગુસ્સો અજીત ચંદીલા પર ઉતાર્યો હોવાનું જાણવા મળ્યું છે.

સૂત્રોના જણાવ્યા અનુસાર કસ્ટડીમાં શ્રીસંત અને ચંદીલા વાતચીત કરી રહ્યા હતા અને શ્રીસંતે ચંદીલા પર પોતાને ફિક્સીંગમાં ફસાવવાનો આરોપ મૂક્યો અને બંને જીભાજોડી પર ઉતરી આવ્યા. શ્રીસંતે ચંદીલાને એમ પણ કહ્યું કે મારી જિંદગી બરબાદ કરવામાં તારો જ હાથ છે. જવાબમાં ચંદીલા પણ ઉગ્ર થઇને બાંયો ચડાવીને શ્રીસંત સામે લડવા આવી ગયો. બંને વચ્ચે મારામારી થવાની તૈયારીમાં જ હતી પરંતુ પોલીસે જઇને બંનેને છૂટા પાડ્યા.

ધરપકડ કરાયા બાદ શ્રીસંત પોતાની તબિયત લથડવાની ફરિયાદ કરતો રહ્યો છે. સૂત્રોના જણાવ્યા અનુસાર તે ડિપ્રેશનમાં આવી ગયો છે અને વારંવાર ઉશ્કેરાઇ જાય છે. IPLમાં મળતી અધધ રકમથી પણ ન ધરાયેલા આ ક્રિકેટરો ફિક્સીંગમાં પણ કાળી કમાણી કરવામાં પાછા નથી પડતા અને હવે ઝડપાયા છે ત્યારે પોતાના દોષોનો ટોપલો એકબીજા માથે ઢોળી રહ્યા છે.

English summary

Fighting between sreesanth and chandila in jail.