World Cup 2023, IND vs PAK: હાઇ સિસ્ક્યોરિટી વચ્ચે રમાશે ભારત-પાકિસ્તાનની મેચ, જાણો કેવી હશે તૈયારી

World Cup 2023, IND vs PAK: ICC ODI વર્લ્ડ કપમાં ભારત અને પાકિસ્તાન વચ્ચે 14 ઓક્ટોબરના રોજ મેચ રમાશે. આ ટક્કર અમદાવાદના નરેન્દ્ર મોદી સ્ટેડિયમમાં યોજાવાની છે. આ મેગા મેચ પહેલા પોલીસ પ્રશાસને કડક સુરક્ષા વ્યવસ્થા ગોઠવી છે.

આ સિવાય સુરક્ષા એજન્સીઓએ પણ તમામ તૈયારીઓ પૂર્ણ કરી લેવામાં આવી છે. આ અંગે અમદાવાદ પોલીસ અધિકારીએ મહત્વની માહિતી આપી છે.

એક વરિષ્ઠ પોલીસ અધિકારીએ જણાવ્યું હતું કે, 14 ઓક્ટોબરના રોજ ભારત-પાકિસ્તાન વર્લ્ડ કપ ક્રિકેટ મેચ દરમિયાન ગુજરાત પોલીસ, NSG, RAF અને હોમગાર્ડ્સ સહિત વિવિધ એજન્સીઓના 11,000 થી વધુ જવાનોને અમદાવાદના નરેન્દ્ર મોદી સ્ટેડિયમમાં તૈનાત કરવામાં આવશે. ધમકીઓને પગલે ઉચ્ચ સ્તરીય સુરક્ષા વ્યવસ્થા કરવામાં આવી છે.

અમદાવાદના પોલીસ કમિશનર જી એસ મલિકે જણાવ્યું હતું કે, અમદાવાદમાં છેલ્લા 20 વર્ષમાં શહેરમાં રમાતી ક્રિકેટ મેચો દરમિયાન ક્યારેય સાંપ્રદાયિક હિંસા જોવા મળી નથી, પરંતુ સાવચેતીના ભાગ રૂપે કેટલાક સાંપ્રદાયિક રીતે સંવેદનશીલ વિસ્તારોમાં સુરક્ષા દળો તૈનાત કરવામાં આવશે.

અગાઉના દિવસે ગુજરાતના મુખ્યપ્રધાન ભૂપેન્દ્ર પટેલે ગૃહ રાજ્ય પ્રધાન હર્ષ સંઘવી, રાજ્યના પોલીસ મહાનિર્દેશક વિકાસ સહાય, જીએસ મલિક અને અન્ય વરિષ્ઠ પોલીસ અધિકારીઓને ગાંધીનગરમાં મળ્યા હતા અને ઉચ્ચ અધિકારીઓના સલામત આચરણને સુનિશ્ચિત કરવા પોલીસના એક્શન પ્લાનની સમીક્ષા કરી હતી.

સાંજે એક પ્રેસ કોન્ફરન્સને સંબોધતા, મલિકે જણાવ્યું હતું કે, મુખ્યપ્રધાને સુરક્ષા તૈયારીઓની સમીક્ષા કરી છે, અને મેચ દરમિયાન કોઈ અનિચ્છનીય ઘટના ન બને, તે સુનિશ્ચિત કરવા માટે તમામ જરૂરી પગલાં લેવા પોલીસને નિર્દેશ આપ્યો છે.

મલિકે જણાવ્યું હતું કે, સ્ટેડિયમમાં 1 લાખથી વધુ દર્શકોની અવરજવર અને ઈમેલ દ્વારા અજાણ્યા વ્યક્તિઓ દ્વારા આપવામાં આવેલી તાજેતરની ધમકી જેવા પરિબળોને ધ્યાનમાં રાખીને વિસ્તૃત સુરક્ષા વ્યવસ્થા કરવામાં આવી છે.

મલિકે જણાવ્યું હતું કે, 7,000 થી વધુ પોલીસ કર્મચારીઓની સાથે, અમે મેચ દરમિયાન સ્ટેડિયમની સુરક્ષા માટે અને શહેરના સાંપ્રદાયિક રીતે સંવેદનશીલ વિસ્તારોમાં કાયદો અને વ્યવસ્થા જાળવવા માટે લગભગ 4,000 હોમગાર્ડ્સ તૈનાત કરીશું. આ જવાનો સિવાય અમે ત્રણ હિટ ટીમ તૈનાત કરીશું. એનએસજીની એન્ટિ-ડ્રોન ટીમ અને બોમ્બ ડિટેક્શન અને ડિસ્પોઝલ સ્કવોડની નવ ટીમોનો પણ ઉપયોગ કરવામાં આવશે.

તેમણે જણાવ્યું હતું કે, ઈન્સ્પેક્ટર જનરલ અને ડેપ્યુટી ઈન્સ્પેક્ટર જનરલના રેન્કના ચાર વરિષ્ઠ આઈપીએસ અધિકારીઓ અને ડેપ્યુટી કમિશનર ઓફ પોલીસ (ડીસીપી)ના રેન્કના 21 અધિકારીઓ મેચના દિવસે કર્મચારીઓનું નિરીક્ષણ અને માર્ગદર્શન કરશે.

તેમણે જણાવ્યું હતું કે, સ્ટેટ રિઝર્વ પોલીસ (એસઆરપી)ની 13 કંપનીઓ ઉપરાંત, અમે અમારી સુરક્ષા વ્યવસ્થાના ભાગરૂપે રેપિડ એક્શન ફોર્સની ત્રણ કંપનીઓને તૈનાત કરીશું. આરએએફ શહેરના સાંપ્રદાયિક રીતે સંવેદનશીલ વિસ્તારો પર નજર રાખશે. અમે લોકોને મદદ કરવા માટે ઈવેક્યુએશન પ્લાન તૈયાર કરી લીધો છે અને સ્ટેડિયમમાં રિહર્સલ પણ ચાલી રહ્યા છે.

તેમણે જણાવ્યું હતું કે, મેચ દરમિયાન કોઈપણ રાસાયણિક, જૈવિક, રેડિયોલોજીકલ અને ન્યુક્લિયર (CBRN) કટોકટીને પ્રતિસાદ આપવા માટે, સ્ટેટ ડિઝાસ્ટર રિસ્પોન્સ ફોર્સ (SDRF) અને નેશનલ ડિઝાસ્ટર રિસ્પોન્સ ફોર્સ (NDRF) ની ટીમો પણ શહેરમાં તૈનાત કરવામાં આવી છે.

અહેવાલો અનુસાર, મુંબઈ પોલીસને એક ઈમેલ મળ્યો હતો, જેમાં એક અજાણ્યા યુઝરે વડાપ્રધાનને નુકસાન પહોંચાડવાની અને અમદાવાદના નરેન્દ્ર મોદી સ્ટેડિયમને ઉડાવી દેવાની ધમકી આપી હતી. યુઝરે 500 કરોડ રૂપિયા અને કુખ્યાત ગેંગસ્ટર લોરેન્સ બિશ્નોઈને જેલમાંથી મુક્ત કરવાની પણ માંગણી કરી હતી.

મલિકે જણાવ્યું હતું કે, શહેર પોલીસ દ્વારા આવી ધમકીઓનું યોગ્ય રીતે મૂલ્યાંકન કરવામાં આવ્યું છે, અને એવું જાણવા મળ્યું છે કે, મેલ વિદેશી સ્થાનેથી મોકલવામાં આવ્યો હતો. અમે આવી ધમકીઓનું મૂલ્યાંકન કર્યું છે અને તે મુજબ અમારી તૈનાતીનું આયોજન કર્યું છે.

તદુપરાંત, જ્યારે એક લાખથી વધુ દર્શકો મેચ જોવા માટે આવી રહ્યા છે, ત્યારે આવી વિસ્તૃત સુરક્ષા વ્યવસ્થા જરૂરી છે. અમદાવાદ શહેર પોલીસ કોઈપણ પરિસ્થિતિનો સામનો કરવા માટે સારી રીતે તૈયાર છે.

English summary

World Cup 2023, IND vs PAK: India-Pakistan match will be played amid high security