95 બોલમાં 171 રન સાથે વૈભવ સૂર્યવંશીના બેટથી વર્લ્ડ રેકોર્ડ

આઈસીસી એકેડમી ગ્રાઉન્ડ ખાતે ચાલી રહેલા અંડર-19 એશિયા કપના ઉદ્ઘાટન મેચમાં ભારતે એક પ્રભાવશાળી સ્કોર નોંધાવ્યો છે. ભારતના યુવા બેટ્સમેન વૈભવ સૂર્યવંશીએ આ મુકાબલામાં ધમાકેદાર પ્રદર્શન કરીને બધાનું ધ્યાન ખેંચ્યું છે.

તેણે માત્ર 95 બોલમાં 171 રનની શાનદાર ઇનિંગ રમી હતી, જેમાં તેનો સ્ટ્રાઇક રેટ 180થી વધુ હતો. ચૌદ વર્ષીય વૈભવે પોતાની ઇનિંગ દરમિયાન 14 ગગનચુંબી છગ્ગા અને 9 ચોગ્ગા ફટકાર્યા.

આ 14 છગ્ગા સાથે વૈભવે યુથ ODI (વન-ડે ઇન્ટરનેશનલ) ક્રિકેટ ઇતિહાસમાં એક ઇનિંગમાં સૌથી વધુ છગ્ગા મારવાનો 17 વર્ષ જૂનો વિશ્વ રેકોર્ડ તોડી દીધો. અગાઉ આ કીર્તિમાન ઓસ્ટ્રેલિયાના માઇકલ હિલના નામે નોંધાયેલો હતો, જેણે ફેબ્રુઆરી 2008માં નામિબિયા U19 સામે 12 છગ્ગા લગાવ્યા હતા. વૈભવે યુએઈના બોલિંગ આક્રમણને સંપૂર્ણપણે ધ્વસ્ત કરીને આ અદ્ભુત સિદ્ધિ હાંસલ કરી.

વૈભવની 171 રનની આ ઇનિંગ યુથ ODIમાં ભારત માટે બીજો સૌથી મોટો વ્યક્તિગત સ્કોર છે. તે 23 વર્ષ જૂના ભારતીય રેકોર્ડ (અંબાતી રાયડુએ 2002માં ઇંગ્લેન્ડ U19 સામે 177 રન બનાવ્યા હતા) ને તોડવાથી માત્ર સાત રનથી પાછળ રહ્યો.

જો કે, વૈભવ સૂર્યવંશીની આ વિસ્ફોટક ઇનિંગના દમ પર, ભારત U19 ટીમે પ્રથમ બેટિંગ કરતા નિર્ધારિત 50 ઓવરમાં 433 રનનો વિશાળ સ્કોર બનાવ્યો.

વૈભવ ઉપરાંત, આરોન જ્યોર્જ અને વિહાન મલ્હોત્રાએ પણ શાનદાર પ્રદર્શન કર્યું, બંનેએ 69-69 રનની અર્ધશતકીય ઇનિંગ્સ રમી. નીચલા ક્રમમાં વેદાંત ત્રિવેદી અને અભિજ્ઞાન કુંડુના યોગદાને ટીમના સ્કોરને 400 પાર પહોંચાડ્યો. ભારતીય બેટ્સમેનોએ કુલ 31 ચોગ્ગા અને 20 છગ્ગા ફટકાર્યા હતા. હવે ટીમ ઇન્ડિયા આ મેચમાં મોટી જીત નોંધાવવા કટિબદ્ધ છે.

English summary

Vaibhav Suryavanshi scores 171 off 95 balls, including 14 sixes, to set a youth ODI record for most sixes in a single innings during the Under-19 Asia Cup opener. India U19 also posted 433 runs, with strong contributions from Aaron George and Vihan Malhotra, highlighting a dominant team performance.