IND vs WI: કુલદીપ યાદવે ટી20માં રચ્યો ઇતિહાસ, યુઝવેન્દ્ર ચહલને છોડ્યો પાછળ

ટીમ ઈન્ડિયાએ મંગળવારે ત્રીજી T20માં વેસ્ટ ઈન્ડિઝને સાત વિકેટે હરાવ્યું હતું. કુલદીપ યાદવ અને સૂર્યકુમાર (83) એ ભારતને જીત અપાવવામાં મહત્વની ભૂમિકા ભજવી હતી. ટીમ ઈન્ડિયાએ 160 રનનો ટાર્ગેટ 17.5 ઓવરમાં ત્રણ વિકેટે 164 રન બનાવીને હાંસલ કર્યો હતો. આ દરમિયાન કુલદીપે એક મોટો રેકોર્ડ પોતાના નામે કર્યો હતો.

ટીમ ઈન્ડિયાના સ્પિનર ​​કુલદીપ યાદવે ત્રીજી T20માં ઘાતક બોલિંગ કરીને કેરેબિયન ખેલાડીઓને પરસેવો પાડી દીધો હતો. તેણે 4 ઓવરમાં 28 રન આપીને ત્રણ મહત્વની વિકેટ લીધી હતી. કુલદીપે ત્રણ વિકેટ પડતાની સાથે જ T20 આંતરરાષ્ટ્રીય ક્રિકેટમાં 50 વિકેટ પૂરી કરી હતી.

કુલદીપ યાદવ વિન્ડીઝ સામે ત્રણ વિકેટ લેતાની સાથે જ T20 આંતરરાષ્ટ્રીય ક્રિકેટમાં 50 વિકેટ લેનારો સાતમો ભારતીય બોલર બની ગયો છે. કુલદીપે ભારત માટે તેની 30મી T20I મેચમાં આ સિદ્ધિ હાંસલ કરી અને તેના સાથી ખેલાડી યુઝવેન્દ્ર ચહલને પાછળ છોડી દીધો, જેણે 34 મેચમાં 50 T20I વિકેટ લીધી હતી.

કુલદીપની 50મી T20I વિકેટ બ્રાન્ડોન કિંગની હતી, જે વેસ્ટ ઈન્ડિઝની ઈનિંગ્સની 15મી ઓવરમાં 42 રન પર કેચ અને બોલ્ડ થઈ ગયો હતો. કુલદીપે મેચની શરૂઆતમાં જોન્સન ચાર્લ્સ અને નિકોલસ પૂરનની વિકેટ લીધી હતી અને ચાર ઓવરમાં 28 રન આપીને ત્રણ વિકેટ લીધી હતી.

હકીકતમાં બોત્સ્વાનાનો ધ્રુવકુમાર મૈસૂરિયા 22 મેચમાં 50 T20I વિકેટ ઝડપનાર સૌથી ઝડપી બોલર છે. ICC પૂર્ણ-સદસ્ય દેશોમાં, શ્રીલંકાના અજંથા મેન્ડિસના નામે 26 T20Iમાં 50 વિકેટનો રેકોર્ડ છે.

ત્રીજી T20 મેચની વાત કરીએ તો વેસ્ટ ઈન્ડિઝે 20 ઓવરમાં પાંચ વિકેટે 159 રન બનાવ્યા હતા. ટાર્ગેટનો પીછો કરતા ડેબ્યુ કરનાર યશસ્વી જયસ્વાલ (1) ટીમ ઈન્ડિયા માટે પ્રથમ ઓવરમાં જ ઓબેદ મેકકોયનો શિકાર બન્યો અને ત્યારબાદ શુભમન ગિલ (6) પણ કંઈ ખાસ કરી શક્યો નહીં.

સૂર્યકુમાર અને તિલક વર્માએ ટીમ ઈન્ડિયાની કમાન સંભાળી હતી. બંનેએ ત્રીજી વિકેટ માટે 87 રનની ભાગીદારી કરી હતી. જો કે, શાનદાર ઇનિંગ બાદ સૂર્યાએ 13મી ઓવરમાં અલઝારી સામે પોતાની વિકેટ ગુમાવી દીધી હતી.

તેણે પોતાની ઇનિંગમાં 10 ચોગ્ગા અને 4 છગ્ગાની મદદથી 83 રન બનાવ્યા હતા. આ પછી તિલક વર્મા (49)ને સપોર્ટ કરવા આવેલા કેપ્ટન હાર્દિક પંડ્યા (20) મેચ જીતીને જ પરત ફર્યા હતા.

English summary

IND vs WI: Kuldeep Yadav creates T20 history, leaves Yuzvendra Chahal behind