IND vs PAK : પાકિસ્તાની ખેલાડીઓની ગાળોનો જવાબ અભિષેકે બેટની આપ્યો, જાણો પુરો ઘટનાક્રમ

IND vs PAK : ભારત અને પાકિસ્તાન વચ્ચે એશિયા કપ 2025નો સુપર ફોર મુકાબલો દુબઈમાં યોજાયો હતો. આ મેચમાં ભારતે શાનદાર જીત મેળવી છે. ભારતના યુવા ઓપનર અભિષેક શર્માએ પોતાની આક્રમક બેટિંગથી બધાનું દિલ જીતી લીધું.

અભિષેકે 74 રનની વિસ્ફોટક ઈનિંગ્સ રમીને ટીમને જીત અપાવી, જેના માટે તેને પ્લેયર ઓફ ધ મેચ તરીકે પસંદ કરવામાં આવ્યો. આ મેચમાં અભિષેકનો પાકિસ્તાની ખેલાડીઓ સાથે તીખો સંઘર્ષ પણ થયો, જેનો તેણે બેટથી જડબાતોડ જવાબ આપ્યો.

મેચ બાદ પોસ્ટ-મેચ પ્રેઝન્ટેશનમાં અભિષેકે પાકિસ્તાની ફાસ્ટ બોલર હારિસ રઉફ અને શાહીન આફ્રિદી સાથે થયેલી બોલાચાલી વિશે ખુલીને વાત કરી.

અભિષેકે કહ્યું કે, આજનો દિવસ બહુ સીધો હતો. તેઓ કોઈ કારણ વગર અમારી પાસે આવી રહ્યા હતા, જે મને બિલકુલ પસંદ ન આવ્યું. એટલે જ મેં તેમના પર હુમલો કર્યો. હું ટીમ માટે સારું પ્રદર્શન કરવા માંગતો હતો.

તેણે આગળ જણાવ્યું કે, શુભમન ગિલ અને હું બાળપણથી સાથે રમીએ છીએ. પાકિસ્તાની ટીમના ઘણા ખેલાડીઓ પણ પંજાબી બોલે છે. મેચના વીડિયોમાં સ્પષ્ટપણે જોવા મળ્યું હતું કે ખેલાડીઓ વચ્ચે ગાળાગાળી થઈ હતી.

અભિષેકના નિવેદન પરથી સ્પષ્ટ છે કે પાકિસ્તાની ખેલાડીઓ, ખાસ કરીને આફ્રિદી અને રઉફ તેને પંજાબીમાં અપશબ્દો બોલી રહ્યા હતા, પણ તેણે પોતાના બેટથી જ તેનો જવાબ આપ્યો.

આ ઘટના ત્યારે બની જ્યારે અભિષેકે શાહીન આફ્રિદીની પહેલી જ બોલ પર સિક્સર ફટકારી હતી. ત્યારબાદ શુભમન ગિલ અને હારિસ રઉફ વચ્ચે પણ બોલાચાલી થઈ હતી અને પછી અભિષેક પોતે પણ રઉફ સાથે તીખી દલીલ કરતા જોવા મળ્યો હતો.

આ મેચમાં માત્ર મેદાન પરનું પ્રદર્શન જ નહીં પણ એક બીજી ઘટનાએ પણ સૌનું ધ્યાન ખેંચ્યું. ભારતીય ખેલાડીઓએ મેચ પૂરી થયા બાદ ફરી એકવાર પાકિસ્તાની ખેલાડીઓ સાથે હાથ મિલાવ્યો નહીં. આ ટુર્નામેન્ટમાં આ બીજો પ્રસંગ હતો, જ્યારે ગ્રુપ સ્ટેજની મેચ પછી પણ ભારતે પાકિસ્તાની ખેલાડીઓ સાથે હાથ મિલાવ્યો ન હતો.

ભારતે પાકિસ્તાનના 172 રનના લક્ષ્યાંકને ખૂબ જ સરળતાથી હાંસલ કરી લીધો. ભારતીય બેટ્સમેનોના શાનદાર પ્રદર્શનથી પાકિસ્તાનની બોલિંગ નબળી પડી. ભારતીય ખેલાડીઓએ મેચમાં ઉત્કૃષ્ટ ધૈર્ય અને રણનીતિનું પ્રદર્શન કર્યું, જેનાથી આ જીત વધુ મહત્ત્વપૂર્ણ બની ગઈ.

English summary

IND vs PAK: Abhishek Sharma Replies to Pakistani Players' Abuse with Bat