IND vs ENG : બીજા T20 પહેલા ભારતને મોટો ઝટકો, સ્ટાર ખેલાડી ઈજાગ્રસ્ત

India vs England 2nd T20I : ભારત અને ઈંગ્લેન્ડ વચ્ચે રમાઈ રહેલી T20 સિરીઝના પહેલા મુકાબલામાં ભારતે શાનદાર જીત મેળવી છે.

હવે બીજો મુકાબલો 25 જાન્યુઆરીએ રમાવા જઈ રહ્યો છે. જો કે આ મુકાબલા પહેલા જ ભારતને મોટો ઝટકો લાગ્યો છે અને સ્ટાર ખેલાડી પર બહાર થવાનો ખતરો મંડરાયો છે.

અહેવાલો અનુસાર, ભારતીય ટીમના વિસ્ફોટક ઓપનરને પ્રેક્ટિસ દરમિયાન મોટી ઈજા થઈ છે. જેના કારણે તેને બીજી T20 મેચમાંથી બહાર બેસવું પડી શકે છે.

ઓપનર અભિષેક શર્માએ ઇંગ્લેન્ડ સામેની પહેલી T20 મેચમાં તોફાની અડધી સદી ફટકારી હતી. અભિષેકે 5 ચોગ્ગા અને 8 છગ્ગાની મદદથી 79 રન બનાવ્યા હતા. જો કે હવે તેને બીજી T20માંથી બહાર બેસવું પડી શકે છે.

નેટ સેશનમાં કેચિંગ ડ્રિલ દરમિયાન અભિષેકના પગની ઘૂંટીમાં વાંક આવી ગયો. આ પછી મેદાન પર ટીમના ફિઝિયોથેરાપિસ્ટ દ્વારા અભિષેકની તપાસ કરવામાં આવી અને પછી તેને પગની ઘૂંટીને આરામ આપવા માટે ડ્રેસિંગ રૂમમાં લઈ જવામાં આવ્યો હતો.

આ દરમિયાન પેવેલિયન પરત ફરતી વખતે તે થોડો લંગડાતો પણ જોવા મળ્યો. તેણે નેટમાં બેટિંગ પણ નહોતી કરી. અભિષેકે ડ્રેસિંગ રૂમમાં ફિઝિયો સાથે અડધા કલાકથી વધુ સમય વિતાવ્યો. જો અભિષેકને શનિવારે અહીં રમાનારી મેચમાંથી બહાર બેસવું પડે છે તો ભારત વોશિંગ્ટન સુંદર અથવા ધ્રુવ જુરેલને પ્લેઇંગ ઇલેવનમાં સમાવી શકે છે.

ભારતીય ટીમ તરફથી અભિષેક શર્મા સાથે સંજુ સેમસન ઓપનિંગ કરવા ઉતરે છે. જો અભિષેક 25 જાન્યુઆરીની સાંજ સુધીમાં ફિટ નહીં થાય તો તિલક વર્માને સંજુ સેમસન સાથે ઇનિંગ ઓપન કરવાની તક મળી શકે છે. ભારત કોલકાતામાં પ્રથમ મેચ સાત વિકેટથી જીતીને ભારત પાંચ મેચની શ્રેણીમાં 1-0થી આગળ છે.

English summary

IND vs ENG: Big blow to India before the second T20, star player injured