રોબોટ્સ કરે છે સિડનીના હાર્બર બ્રિજની સફાઇ

સિડની, 18 જુલાઇ : તમને નવાઇ તો લાગશે પણ વાત જોરદાર છે. ઓસ્ટ્રેલિયામાં આવેલા શહેર સિડનીના પ્રસિદ્ધ હાર્બર બ્રિજની સફાઇ આજકાલ માણસો નહીં પણ બે રોબોટ્સ કરી રહ્યા છે. આ રોબોટ્સ તેમનું સફાઇનું કામ કરી લેશે, ત્યાર બાદ બ્રિજને રંગ રોગાન કરવામાં આવશે.

હાલમાં 81 વર્ષ જુના પુલ પરનો પેઇન્ટ ઉખાડવામાં આવી રહ્યો છે. લેડ એટલે કે સીસાયુક્ત પેઇન્ટ ઉતારવો માણસો માટે જોખમવાળું કામ છે. આ કારણે તેમાં રોબોટ્સની મદદ લેવામાં આવી છે. આ બંને રોબોટનું વજન 25 કિલોગ્રામ છે. તેની બનાવટમાં સેન્સર અને કેમેરા બંનેનો ઉપયોગ કરવામાં આવ્યો છે.

આ કામ માટે તૈયાર કરવામાં આવેલા રોબોટ્સના હાથ બે મીટર લાંબા છે. તેમના હાથ જુના પુલ પર જોરથી હવા ફેંકીને પેઇન્ટ અને કાટ ઉખાડે છે. સિડનીની એક યુનિવર્સિટીમાં તૈયાર કરવામાં આવેલા રોબોટ પહેલા એક નિશ્ચિત સ્થાન પસંદ કરે છે. ત્યાર બાદ તે સ્થાનનું થ્રીડી ચિત્ર તૈયાર કરે છે. તેના આધારે તેઓ નિર્ણય લે છે કે કયા સ્થાનને સાફ કરવા માટે કેટલા જોરથી હવા ફેંકવાની જરૂર છે.

આ અંગે સિડનીની યુનિવર્સિટી ઓફ ટેકનોલોજીના માર્ટિન લોયડે બીબીસીને જણાવ્યું કે "દુનિયામાં આ પ્રકારની ટેકનિક પ્રથમવાર ઉપયોગમાં લેવામાં આવી રહી છે. જ્યાં સફાઇનું કામ મશીનના હાથમાં સોંપવામાં આવ્યું છે. આવા બે રોબોટ સિડની બ્રિજ પર કામ કરી રહ્યા છે."

English summary

Robots are cleaning Sydney's Harbour Bridge.