રાજકોટ સીટી બસ ડ્રાઈવરનો ચાલુ બસે મસાલો ચોળતો વીડિયો વાયરલ, સસ્પેન્ડ કરાયો

By Desk

Published: Sunday, March 2, 2025, 20:14 [IST]

રાજકોટમાં બીઆરટીએસ રૂટ પર ચાલી રહેલી સીટી બસ સેવા ફરી એકવાર વિવાદોમાં આવી છે. સીટી બસના ડ્રાઈવર ઈન્દ્રજીતસિંહ મોરીનો ચાલતી બસમાં માવો ઘસતો હોવાનો વિડિયો સોશિયલ મીડિયા પર વાયરલ થયો હતો.

આ વીડિયો વાયરલ થયા બાદ મ્યુનિસિપલ તંત્રએ તાત્કાલિક કાર્યવાહી હાથ ધરી ડ્રાઈવરને સસ્પેન્ડ કર્યો છે. વીડિયો વાયરલ થયા બાદ તંત્ર એક્શનમાં આવ્યુ અને કાર્યવાહી કરાઈ છે.

આ સમગ્ર મામલે રાજકોટ મ્યુનિસિપલ કોર્પોરેશનના સીટી એન્જિનીયર પરેસ અઢીયાએ એક નિવેદનમાં મીડિયાને જણાવ્યુ કે, આ વીડિયો ધ્યાને આવ્યો છે અને ખૂબ જ ગંભીર બાબત છે. મુસાફરોના જીવ જોખમમાં મૂકીને આવી બેદરકારી સ્વીકારી શકાય નહીં. ડ્રાઈવર ઈન્દ્રજીતસિંહ મોરીને તાત્કાલિક સસ્પેન્ડ કરી દેવામાં આવ્યો છે અને નવી નોટિસ ન થાય ત્યાં સુધી સેવામાં પરત બોલાવવામાં આવશે નહીં.

આ વીડિયો માધાપર ચોકડીથી ગોંડલ ચોકડી જતાં બસનો હોવાનું જાણવા મળ્યું છે. છેલ્લા કેટલાક સમયથી સીટી બસ ડ્રાઈવરોની બેદરકારીને કારણે અવાર-નવાર અકસ્માતો થવાની ઘટનાઓ સામે આવી રહી છે.

આ ઘટનાને કારણે સીટી બસ સેવાની સલામતી પર પ્રશ્નાર્થ ઉઠ્યા છે. તંત્ર દ્વારા ડ્રાઈવરો માટે કડક નિયમો લાગુ કરવાનો પ્રયાસ કરવામાં આવશે કે કેમ તે જોવાનું રહેશે.

Published On March 2, 2025