મુંબઇ ગેંગરેપના આરોપીઓ પર કોર્ટમાં ફેંકાયા ઇંડા!

Published: Friday, August 30, 2013, 17:58 [IST]

મુંબઇ, 30 ઑગસ્ટ : મુંબઇ ગેંગરેપના આરોપીઓ સામેનો ગુસ્સો શાંત થતો નથી દેખાઇ રહ્યો. આજે કોર્ટમાં આ આરોપીઓની હાજરી દરમિયાન મહિલા પ્રદર્શન કારીઓએ તેમની પર ઇંડાનો વરસાદ કર્યો. આરોપીઓની આજે કિલ્લા કોર્ટમાં હાજરી હતી, દરમિયાન આ ઘટના ઘટવા પામી હતી.

મહિલાઓએ તેમની સામે જોરદાર સૂત્રોચ્ચાર કર્યા અને સખતમાં સખત સજા ફટકારવાની માંગ કરી. આ મહિલાઓ કોર્ટની બહાર ગેંગરેપના આરોપીઓનો વિરોધ કરવા માટે પોસ્ટરો લઇને ખડેપગે સૂત્રોચ્ચાર કરી રહી હતી.

આ પાંચેય આરોપીઓએ 22 ઑગસ્ટના રોજ 23 વર્ષની ફોટો જર્નાલિસ્ટ સાથે સામુહિક દુષ્કર્મ આચર્યું હતું. યુવતી પોતાના સહકર્મી સાથે મળીને મીલ કમ્પાઉન્ડમાં ફોટોગ્રાફી કરવા માટે ગઇ હતી. મુંબઇ પોલીસે આ કેસમાં આરોપીઓનો વધું એક મોબાઇ જપ્ત કર્યો છે.

આ ઉપરાંત પોલીસે આ પહેલા પણ એક આરોપી સલીમ અંસારી પાસેથી એક ફોન કબ્જે લીધો હતો, જેનાથી તેણે ગેંગરેપ દરમિયાન તસવીરો પણ લીધી હતી. બાદમાં તેણે આ તસવીરોને ડિલીટ કરી દીધી હતી. પોલીસ હવે ફોરેંસિક એક્સપર્ટની મદદથી તસવીરો પરત લાવવાનો પ્રયત્ન કરી રહી છે.

Published On August 30, 2013