PM મોદી આજે મણિપુરની મુલાકાતે, હિંસા બાદ પ્રથમ પ્રવાસ, આપશે કરોડોના પ્રોજેક્ટની ભેટ

PM Modi Manipur Visit: PM નરેન્દ્ર મોદી આજે (13 સપ્ટેમ્બર, 2025) મણિપુરની મુલાકાત લેશે, જે મે 2023માં નસ્લી હિંસા ફાટી નીકળ્યા બાદ તેમનો પ્રથમ પ્રવાસ છે. આ પ્રવાસ દરમિયાન તેઓ મૈતેઈ બહુમતિ ધરાવતા ઇમ્ફાલ અને કુકી બહુમતિ ધરાવતા વિસ્તાર ચુરાચાંદપુરમાં વિવિધ વિકાસ યોજનાઓનો શિલાન્યાસ કરશે અને જનસભાઓને સંબોધશે. આ પ્રવાસ મણિપુરમાં લાંબા સમયથી ચાલતી હિંસાને નાથવા અને શાંતિની રાહ મોકળી કરવા માટે મહત્વનો માનવામાં આવે છે.

મણિપુરમાં મે 2023માં મણિપુર હાઈકોર્ટના એક ચુકાદા બાદ મૈતેઈ અને કુકી સમુદાયો વચ્ચે હિંસા ફાટી નીકળી હતી. આ હિંસાને કારણે કુકી સમુદાયે NH-2 સહિત અન્ય રાજમાર્ગો બંધ કરી દીધા હતા. આ હિંસાને નાથવા માટે ફેબ્રુઆરી 2025માં મણિપુરમાં રાષ્ટ્રપતિ શાસન લાગુ કરવામાં આવ્યું હતું. ત્યારબાદ બંને સમુદાયો સાથે અલગ-અલગ અને સંયુક્ત બેઠકો યોજાઈ, જેના પરિણામે ગયા મહિને શાંતિના પ્રયાસો સફળ થયા હતા. દિલ્હીમાં કુકી ઉગ્રવાદી જૂથોએ 'સસ્પેન્શન ઓફ ઓપરેશન' પર હસ્તાક્ષર કરીને તેમના શિવિરોને મૈતેઈ વિસ્તારોથી દૂર કરવાની સહમતી આપી હતી. કુકી-ઝો સંગઠને પણ NH-2 સહિત તમામ રાજમાર્ગો ખોલવા માટે સંમતિ દર્શાવી હતી.

આપશે કરોડોના પ્રોજેક્ટની ભેટ

PM નરેન્દ્ર મોદીનો આ પ્રવાસ શાંતિની દિશામાં સ્થાયી પગલાં ભરવા માટે મહત્વનો છે. ઇમ્ફાલ અને ચુરાચાંદપુરની પસંદગી એ દર્શાવે છે કે સરકાર બંને સમુદાયોને સમાન મહત્વ આપે છે અને કોઈ પણ પ્રકારનો ભેદભાવ નહીં કરે. PM મોદી ચુરાચાંદપુરમાં 7,300 કરોડ રૂપિયા અને ઇમ્ફાલમાં 3,600 કરોડ રૂપિયાના વિકાસ પ્રોજેક્ટનો શિલાન્યાસ કરશે. આ ઉપરાંત, 2,500 કરોડ રૂપિયાના રાષ્ટ્રીય ધોરીમાર્ગના પાંચ પ્રોજેક્ટ, મણિપુર ઇન્ફોટેક ડેવલપમેન્ટ પ્રોજેક્ટ અને નવ સ્થળોએ વર્કિંગ વુમન હોસ્ટેલનો શિલાન્યાસ પણ કરશે.

મણિપુર બાદ અન્ય રાજ્યોની પણ લેશે મુલાકાત

મણિપુરની મુલાકાત બાદ PM મોદી આગામી થોડા મહિનામાં વિધાનસભા ચૂંટણીઓવાળા રાજ્યો અસમ, પશ્ચિમ બંગાળ અને બિહારનો પ્રવાસ કરશે. અસમમાં 13 સપ્ટેમ્બરે ભારત રત્ન ભૂપેન હઝારિકાની જન્મશતાબ્દીના કાર્યક્રમમાં હાજરી આપશે અને 14 સપ્ટેમ્બરે 18,500 કરોડ રૂપિયાના પ્રોજેક્ટનું ઉદ્ઘાટન અને શિલાન્યાસ કરશે. 15 સપ્ટેમ્બરે કોલકાતામાં 16મી સંયુક્ત કમાન્ડર કોન્ફરન્સનું ઉદ્ઘાટન કરશે અને ત્યારબાદ બિહારના પૂર્ણિયામાં હવાઈ મથકના નવા ટર્મિનલનું ઉદ્ઘાટન કરશે. સાથે જ રાષ્ટ્રીય મખાણા બોર્ડની શરૂઆત કરશે. પૂર્ણિયામાં 3,600 કરોડ રૂપિયાની યોજનાઓનું ઉદ્ઘાટન અને શિલાન્યાસ પણ કરશે, જેમાં ભાગલપુરના પીરપૈંતીમાં 2,400 મેગાવોટનો થર્મલ પાવર પ્લાન્ટ અને કોશી-મેચી નદી જોડવાનો આંતરરાષ્ટ્રીય પ્રોજેક્ટ સામેલ છે.

English summary

PM Narendra Modi's visit will include interaction with people displaced by the Manipur unrest, the laying of foundation stones for development projects.