Karnataka CM : કોંગ્રેસ ધારાસભ્યોની બેઠક પુરી, મલ્લિકાર્જુન ખડગે નવા મુખ્યમંત્રીનો નિર્ણય કરશે

By Desk

Published: Sunday, May 14, 2023, 21:53 [IST]

કોંગ્રેસે બીજેપીને હરાવીને કર્ણાટકમાં સરકાર બનાવવા માટે તૈયારી શરૂ કરી છે. આ ક્રમમાં આજે જીતેલા ધારાસભ્યોની બેઠક મળી હતી. આ બેઠકમાં એક લાઈનનો ઠરાવ પસાર કરીને નવા મુખ્યમંત્રીની પસંદગી મલ્લિકાર્જુન ખડગે પર છોડાયો છે.

રવિવારે સાંજે બેંગલુરુમાં કોંગ્રેસ ધારાસભ્ય દળની બેઠક શરૂ થઈ હતી, જેમાં કર્ણાટકના પૂર્વ મુખ્યમંત્રી સિદ્ધારમૈયા, કર્ણાટક કોંગ્રેસના વડા ડીકે શિવકુમાર, કોંગ્રેસના સાંસદ અને નેતા કેસી વેણુગોપાલ અને અન્ય કોંગ્રેસી નેતાઓ બેઠકમાં હાજર હતા.

આ બેઠકમાં તમામ ધારાસભ્યોએ સર્વસંમતિથી નિર્ણય લીધો અને ઠરાવ જારી કર્યો છે. કોંગ્રેસના ધારાસભ્યોએ સર્વસંમતિથી ઠરાવ કર્યો કે AICC પ્રમુખ મલ્લિકાર્જુન ખડગેને કોંગ્રેસ વિધાનમંડળ પક્ષના નવા નેતાની નિમણૂક કરવા માટે અધિકૃત કરવામાં આવ્યા છે.

આ પહેલા સિદ્ધારમૈયા અને ડીકે શિવકુમારના સમર્થકો હોટેલની બહાર તેમના નેતાઓની તરફેણમાં સૂત્રોચ્ચાર કરતા જોવા મળ્યા હતા. આ હોટલમાં જ ધારાસભ્યોની બેઠક યોજાઈ રહી હતી.

Published On May 14, 2023