Jharkhand Election 2024 : ઝારખંડ ચૂંટણી માટે બીજેપીનો મેનિફેસ્ટો જાહેર, જાણો મહત્વના વાયદાઓ

By Desk

Published: Sunday, November 3, 2024, 18:39 [IST]

Jharkhand Assembly Election 2024 : ઝારખંડ વિધાનસભા ચૂંટણી માટે બીજેપીએ તેનો મેનિફેસ્ટો જાહેર કરી દીધો છે.

આ વખતે બીજેપીએ દર વખતની જેમ જ મોટા વાયદાનો વરસાદ કર્યો છે. આ મેનિફેસ્ટોમાં ઘણી બાબતો એવી છે જે માત્ર વાયદા પુરતી સિમિત દેખાઈ રહી છે.

અમિત શાહે રાંચીમાં એક કાર્યક્રમમાં બીજેપીનો આ ચૂંટણી મેનિફેસ્ટો જાહેર કર્યો. ભાજપે ઝારખંડના 25 વર્ષ પર 25 સંકલ્પ પત્રો જારી કર્યા છે.

બીજેપીએ આ ઢંઢેરામાં ઝારખંડની જનતાને 25 વચનો આપ્યા છે. જેમાં મહિલાઓને ગોગો દીદી યોજના હેઠળ દર મહિને 2100 રૂપિયા આપવાની જાહેરાત કરાઈ છે. આ સિવાય સ્ટેમ્પ ડ્યુટી ઘટાડીને 1 રૂપિયો કરવાનું વચન આપ્યુ છે. તે સિવાય લક્ષ્મી જોહર યોજના હેઠળ 500 રૂપિયાના ગેસ સિલિન્ડર આપવાનું વચન આપ્યુ છે.

બીજેપીના 25 વાયદા

ગોગો દીદી યોજના હેઠળ મહિલાઓને દર મહિને 2,100 રૂપિયા મળશે. મહિલાઓ માટે 2,100 રૂપિયા પ્રતિ માસ સાથે 2 ફ્રી સિલિન્ડરનો વાયદો.
લક્ષ્મી જોહર યોજના હેઠળ 500 રૂપિયામાં ગેસ સિલિન્ડર આપવાનું વચન. એક વર્ષમાં બે સિલિન્ડર બિલકુલ ફ્રી
યુવાનોને 2 વર્ષ માટે દર મહિને 2,000 રૂપિયાની પ્રોત્સાહક રકમ આપવાનું વચન આપવામાં આવ્યું છે.
21 લાખ પરિવારોને તેમના કાયમી મકાનોનું વચન આપવામાં આવ્યું છે. આ સાથે મફત નળ કનેક્શન પણ અપાશે.
ઘૂસણખોરોને રોકવા અને કબજે કરેલી જમીનો પરત કરવા માટે કડક કાયદાનો અમલ કરવામાં આવશે.
મહિલાઓ માટે માત્ર 1 રૂપિયાની સ્ટેમ્પ ડ્યુટી લાદવામાં આવશે. એટલે કે જમીનની નોંધણી માટે મહિલાઓએ માત્ર એક રૂપિયાની સ્ટેમ્પ ડ્યુટી ચૂકવવી પડશે.
સરકારી સંસ્થાઓમાં B.Ed, નર્સિંગ અને અન્ય વ્યાવસાયિક અભ્યાસક્રમો મફત કરાશે. ખાનગી સંસ્થાઓમાં ટ્યુશન ફી માફ કરવામાં આવશે.
ઝારખંડમાં વિસ્થાપન પહેલા પુનર્વસન સુનિશ્ચિત કરવા માટે પુનર્વસન આયોગની રચના કરાશે.
આદિવાસી સંસ્કૃતિને પુનઃસ્થાપિત કરવા અને પ્રોત્સાહિત કરવા માટે સિધો-કાન્હો સંશોધન કેન્દ્રની સ્થાપનાનું વચન.
ફૂલો-ઝાનો પઢો બીટીયા યોજના હેઠળ ગરીબ અને પછાત વર્ગની દીકરીઓને કેજીથી પીજી સુધીનું શિક્ષણ.
માતૃત્વ સુરક્ષા યોજના હેઠળ દરેક સગર્ભા સ્ત્રીને 6 પોષણ કિટ અને ₹ 21,000 ની સહાય આપવામાં આવશે.
70 વર્ષથી વધુ વયના વૃદ્ધોને 10 લાખ રૂપિયા સુધીની મફત સારવાર મળશે, દરેક જિલ્લામાં 10 નવી સરકારી મેડિકલ કોલેજ અને એક નર્સિંગ કોલેજની સ્થાપના કરવામાં આવશે.
બે વર્ષમાં નક્સલવાદનો અંત લવાશે.
સરપંચોનો પગાર બમણો કરીને ₹5000 કરશે.
2027 સુધીમાં ઝારખંડને માનવ તસ્કરીથી મુક્ત બનાવવા માટે ઓપરેશન સુરક્ષા શરૂ કરવામાં આવશે.
કૃષક સુ-નીતિ હેઠળ ક્વિન્ટલ દીઠ ₹3,100 સુધીમાં ડાંગર ખરીદવામાં આવશે. 5 એકર સુધીની જમીન પર પ્રતિ એકર ₹5,000ના દરે કૃષિ આશીર્વાદ યોજના લાગુ કરવામાં આવશે.
સરકારી નોકરીઓ અને શૈક્ષણિક સંસ્થાઓમાં અનામત પ્રથા ચાલુ રાખવાનું વચન આપ્યું છે. OBC માટે 27% અનામત યથાવત રહેશે.
ડાયમંડ ચતુર્ભુજ એક્સપ્રેસવેનું નિર્માણ, પ્રધાનમંત્રી ગ્રામ સડક યોજના હેઠળ 25,000 કિમીના રસ્તાઓનું નિર્માણ, રાજધાની રાંચી સાથે દરેક જિલ્લા મુખ્યાલયને જોડવા માટે રેલ નેટવર્કનું વિસ્તરણ.
ઝારખંડ બહાર રહેતા ઝારખંડવાસીઓની સુવિધા માટે દેશના તમામ મોટા શહેરોમાં જોહર ભવન બનાવશે.
વૃદ્ધો, વિધવાઓ અને અપંગ લોકો માટે ₹2,500 સુધીનું માસિક પેન્શન લાગુ કરવામાં આવશે.
ગ્રામીણ આજીવિકાને પ્રોત્સાહન આપવા અરહર અને મદુઆને એમએસપીમાં સામેલ કરવાનું અને આદિવાસી બ્લોક્સમાં પ્રોસેસિંગ કેન્દ્રો સ્થાપવાનું વચન.
આદિવાસી સમુદાયને યુનિફોર્મ સિવિલ કોડ (UCC) કાર્યક્ષેત્રમાંથી બહાર રાખશે અને PESA કાયદા દ્વારા વડાઓ અને પંચાયતી રાજ સંસ્થાઓને સશક્તિકરણ કરશે.
ઝારખંડને કૌશલ્ય વિકાસના હબ તરીકે વિકસાવશે.
ભાજપે ઝારખંડને પ્રવાસન હબ બનાવવા માટે આદિવાસી સર્કિટ, ઈકો-ટૂરિઝમ અને સાંસ્કૃતિક કેન્દ્રો વિકસાવવાનું વચન આપ્યું છે.
ઝારખંડ ઇન્ટર્નશીપ અને કૌશલ્ય પ્રશિક્ષણ (JIST) પ્રોગ્રામ શરૂ કરશે અને 5 લાખ યુવાનોને તાલીમ અને ₹ 1 લાખની નાણાકીય સહાય આપશે.