કોરોના વાયરસને લઈને લડાઈ માટે દેશ તૈયાર છે? મૉક ડ્રિલમાં સામે આવી સચ્ચાઈ

કોરોના વાયરસે ચીનમાં મચાવેલી તબાહી પછી ભારત સરકારે મંગળવારે દેશભરની હૉસ્પિટલોમાં મૉક ડ્રીલ કરી. આવો જાણીએ કેવી છે તૈયારી.

Published: Wednesday, December 28, 2022, 10:27 [IST]

Corona Mock Drill: ચીનમાં એક વાર ફરીથી કોરોના વાયરસે મચાવેલી તબાહી પછી દુનિયામાં બધા દેશો એલર્ટ થઈ ગયા છે. ભારત સરકાર પણ સાવચેતીના પગલાં લઈ રહી છે. આ ક્રમમાં મંગળવારે બધી સરકારી હૉસ્પિટલોમાં મૉક ડ્રીલ થઈ. જેમાં કેન્દ્રીય આરોગ્ય મંત્રી મનસુખ માંડવિયા અને તેમના રાજ્ય સ્તરીય સમકક્ષોએ દેશની અમુક મોટી હૉસ્પિટલોની મુલાકાત લીધી અને બેડની ઉપલબ્ધતા, દવાઓ, વેંટિલેટર જેવા ઉપકરણોના સ્ટૉક અને સ્ટાફની સમીક્ષા કરી.

મંગળવારે કેન્દ્રીય આરોગ્ય મંત્રીએ દિલ્લીની સફદરજંગ હૉસ્પિટલની મુલાકાત લીધી હતી. આ દરમિયાન તેમણે કહ્યુ કે ઘણા દેશોમાં કોવિડના કેસ વધી રહ્યા છે. આવી સ્થિતિમાં ભારતમાં પણ કેસમાં વધારો જોવા મળી શકે છે. તેથી એ મહત્વનુ છે કે હૉસ્પિટલના તમામ સાધનો અને માનવ સંસાધનોની દ્રષ્ટિએ સમગ્ર કોવિડ ઇન્ફ્રાસ્ટ્રક્ચર સ્ટેન્ડબાયની સ્થિતિમાં હોય જેથી કટોકટીની સ્થિતિમાં કોરોના સામે લડી શકાય.

આરોગ્ય મંત્રી અને નિષ્ણાતોના જણાવ્યા મુજબ ભારતમાં અત્યારે કોરોના સંક્રમણના બહુ ઓછા કેસ સામે આવી રહ્યા છે. આવી સ્થિતિમાં ભારતમાં જે ટ્રેન્ડ ચાલી રહ્યો છે તે મુજબ અહીં કોરોના વધુ ખતરનાક સાબિત નહિ થાય. વળી, નિષ્ણાતોએ એમ પણ કહ્યુ કે ચીનમાં અચાનક લૉકડાઉન ખોલવાને કારણે આવી સ્થિતિ બની છે.

મૉક ડ્રીલથી પરિચિત લોકોએ જણાવ્યુ હતુ કે અભ્યાસનુ ફોકસ મોટા પાયે આરોગ્ય સુવિધાઓ જેમ કે પથારીની ક્ષમતા, આઇસોલેશન બેડ, ઑક્સિજન આઇસોલેશન બેડ, આઇસીયુ બેડ અને વેન્ટિલેટર આધારિત પથારીની ઉપલબ્ધતા ચકાસવાનુ હતુ. આના માટે ડ્રીલમાં માનવ સંસાધનોની ઉપલબ્ધતા જેમ કે ડૉકટરો, નર્સો, પેરામેડિક્સ, આયુષ ડૉકટરો અને અન્ય ફ્રન્ટલાઈન કાર્યકર્તા, મેડિકલ ઑક્સિજનનો પુરવઠો કે જેમાં ઑક્સિજન કોન્સેન્ટ્રેટર, ઑક્સિજન સિલિન્ડરો, પીએસએ પ્લાન્ટ્સ, લિક્વિડ મેડિકલ ઑક્સિજન સ્ટોરેજ ટેંક વગેરે ચકાસવામાં આવ્યા હતા. વળી, ડમી દર્દીઓ વગેરેને પણ ડ્રીલમાં સમાવિષ્ટ કરીને વિવિધ પ્રક્રિયાઓનુ આકલન કરવામાં આવ્યુ હતુ.

તમિલનાડુના આરોગ્ય મંત્રીએ કહ્યુ ગભરાવાની જરુર નથી

મૉક ડ્રીલ બાદ તમિલનાડુના આરોગ્ય મંત્રી સુબ્રમણ્યમે કહ્યુ કે અમારી પાસે ઑક્સિજનનો પૂરતો સ્ટોક છે. જનતાએ ગભરાવાની જરૂર નથી. તમિલનાડુના આરોગ્ય મંત્રીએ રાજીવ ગાંધી સરકારી જનરલ હૉસ્પિટલમાં એક ડ્રીલનુ પણ નિરીક્ષણ કર્યુ હતુ. તેમણે કહ્યુ કે રાજ્ય પાસે પૂરતી દવાઓ, પથારી, સાધનો અને ઑક્સિજન છે.

ઉત્તર પ્રદેશમાં શું છે તૈયારી?

ઉત્તર પ્રદેશમાં ઉપ મુખ્યમંત્રી બ્રજેશ પાઠકે લખનઉની એક હૉસ્પિટલની મુલાકાત લીધી હતી. આ દરમિયાન તેમણે પત્રકારોને કહ્યુ કે તેમણે લખનઉની બલરામપુર હૉસ્પિટલમાં કોવિડ મેનેજમેન્ટ (સુવિધાઓ), ઑક્સિજન પ્રવાહ અને વેંટીલેટર વ્યક્તિગત રીતે તપાસ્યા અને બધુ બરાબર છે. કટોકટીની સ્થિતિમાં કેવી રીતે કાર્ય કરવુ તેના પર મેડિકલ, પેરામેડિકલ અને નર્સિંગ સ્ટાફ માટે એક ડ્રીલ હાથ ધરવામાં આવી રહી છે.

કોરોના માટે દિલ્લી તૈયાર

દિલ્લીના ઉપ મુખ્યમંત્રી મનીષ સિસોદિયા પાસે પણ આરોગ્ય વિભાગ પણ છે. તેમણે મંગળવારે સરકારી લોક નાયક જય પ્રકાશ નારાયણ (LNJP) હૉસ્પિટલની મુલાકાત લીધી અને કાર્યવાહી અને તૈયારીઓની સમીક્ષા કરી. આ બાબતથી વાકેફ લોકોએ જણાવ્યુ હતુ કે સરકાર મંગળવારથી દિલ્લી સરકારના પોર્ટલ પર બેડ, ઑક્સિજન સિલિન્ડર અને વેન્ટિલેટરની ઉપલબ્ધતા પર રીઅલ-ટાઇમ ડેટાની ઉપલબ્ધતા ફરી શરૂ કરશે.

બંગાળમાં દરેક જિલ્લામાં બનાવવામાં આવી એક મોટી હૉસ્પિટલ

બંગાળમાં અભ્યાસ સાથે સંકળાયેલા એક અધિકારીએ જણાવ્યુ હતુ કે કોલકાતામાં ત્રણ સરકારી હૉસ્પિટલો - ચેપી રોગો અને બીજી હૉસ્પિટલ, સંભુનાથ પંડિત હૉસ્પિટલ અને એમઆર બાંગુર હૉસ્પિટલ નિર્ધારિત કરવામાં આવી છે જ્યાં કોઈ પણ સ્પાઈકના કિસ્સામાં કોવિડ -19 દર્દીઓને ખસેડવામાં આવશે. અધિકારીએ નામ જાહેર ન કરવાની શરતે જણાવ્યુ હતુ કે દરેક જિલ્લામાં ઓછામાં ઓછી એક હૉસ્પિટલ નિર્ધારિત કરવામાં આવી છે જેથી શરૂઆતમાં જો કોઈ સ્પાઇક હોય તો તેની સાથે વ્યવહાર કરી શકાય.

મૉક ડ્રીલમાં આ સુવિધાઓનુ પણ કરવામાં આવ્યુ પરીક્ષણ

મૉક ડ્રીલમાં સામેલ એક વ્યક્તિએ જણાવ્યુ હતુ કે, ડ્રીલ દરમિયાન રેફરલ પ્રક્રિયાઓનુ મૂલ્યાંકન, અદ્યતન અને મૂળભૂત જીવન સહાયક એમ્બ્યુલન્સની ઉપલબ્ધતા, જાહેર-ખાનગી ભાગીદારી હેઠળ અથવા એનજીઓ સાથે અન્ય એમ્બ્યુલન્સની ઉપલબ્ધતા, કાર્યરત એમ્બ્યુલન્સ કૉલ સેન્ટર્સની પરીક્ષણ ક્ષમતા, આરટીની ઉપલબ્ધતા, પીસીઆર અને રેપિડ એન્ટિજેન ટેસ્ટ કીટ, ટેસ્ટીંગ સાધનો અને આરોગ્ય કર્મચારીઓને આપવામાં આવતી પીપીઈ કીટ વગેરેની પણ તપાસ કરવામાં આવી હતી.

ડ્રીલ પછી એક્સપર્ટસે રસી લગાવવાની પણ કરી અપીલ

નિષ્ણાંતોએ સાવચેત રહેવા રસીકરણ પર ધ્યાન આપવાની જરૂર પણ જણાવી છે. રોગચાળા સામે લડવા માટે સરકારે ગયા અઠવાડિયે એક નવી રસીને સામેલ કરી જે INCOVACC તરીકે ઓળખાય છે અને તે એક નેઝલ વેક્સીન છે. આવી સ્થિતિમાં, સરકારે આશા વ્યક્ત કરી છે કે આ રસી શરૂ થવાથી વધુને વધુ લોકો કોઈપણ ભય વિના રસી લેશે.

મંગળવારે ભારતમાં આવ્યા 500થી પણ ઓછા કેસ

મંગળવારે ભારતમાં ચાર અઠવાડિયાથી સરેરાશ એક દિવસમાં 500થી ઓછા કેસ નોંધાયા છે. તમને જણાવી દઈએ કે ભારતમાં અત્યાર સુધીમાં કોરોનાની ત્રણ લહેર આવી ચૂકી છે. પ્રથમ વેવ એપ્રિલ-મે 2020માં આવી હતી. જ્યારે બીજી મે-જૂન 2021માં આવી હતી અને ત્રીજી લહેર જાન્યુઆરી-ફેબ્રુઆરી 2022માં આવી હતી. નિષ્ણાતોના મતે કોરોના BF.7 વેરિઅન્ટ જે હાલમાં ચીનમાં તબાહી મચાવી રહ્યુ છે તેના દર્દીઓ ભારતમાં પહેલેથી જ હાજર છે. જો કે હજુ સુધી આ અંગે વધુ અભ્યાસ કરવામાં આવ્યો નથી.

Published On December 28, 2022