ખડગેના આઝાદીની લડાઈ મુદ્દે નિવેદન બાદ સંસદમાં બીજેપીનો હંગામો, ખડગે નિવેદન પર અડગ

કોંગ્રેસ અધ્યક્ષ મલ્લિકાર્જુન ખડગેએ કહ્યું હતું કે આઝાદીની લડાઈમાં બીજેપીનું કુતરુય મર્યુ નથી. હવે આ નિવેદનને લઈને સંસદમાં હંગામો થયો છે.

નવી દિલ્હી : કોંગ્રેસ અધ્યક્ષ મલ્લિકાર્જુન ખડગેના આઝાદીની લડાઈને લઈને આવેલા નિવેદને વિવાદ છેડ્યો છે. આ વિવાદ હવે સંસદ સુધી પહોંચ્યો છે. રાજ્યસભામાં બીજેપીએ ખડગેના નિવેદનને લઈને હંગામો મચાવ્યો હતો અને માફીની માંગ કરી હતી. કેન્દ્રિય મંત્રી પિયુષ ગોયલે માફીની માંગ કરતાં કહ્યું કે, ખડગેએ અભદ્ર ભાષાનો ઉપયોગ કર્યો છે. હું તેમના અભદ્ર ભાષણની સખત નિંદા કરું છું.

મલ્લિકાર્જુન ખડગેના નિવેદન બાદ સતત રાજનીતિ ગરમાઈ રહી છે ત્યારે હવે કેન્દ્રિયમંત્રી પ્રહલાદ જોશીએ કહ્યું કે, આ ડુપ્લીકેટ કોંગ્રેસ છે. નકલી કોંગ્રેસ છે. આ સરદાર વલ્લભભાઈ પટેલ, મહાત્મા ગાંધીની કોંગ્રેસ નથી. બીજી તરફ કોંગ્રેસ અધ્યક્ષ મલ્લિકાર્જુન ખડગે પણ પોતાના નિવેદન પર અડગ છે.

અહીં તમને જણાવી દઈએ કે, કોંગ્રેસના અધ્યક્ષ મલ્લિકાર્જુન ખડગેએ વિવાદીત નિવેદન આપતા કહ્યું હતું કે, આઝાદીની લડાઈમાં કોંગ્રેસના ઘણા નેતાઓએ જીવ આપ્યા, પરંતુ ભાજપના લોકોના ઘરેથી આઝાદીની લડાઈમાં એક કૂતરુ પણ મર્યુ નથી. ખડગેએ કહ્યું કે અમે દેશને આઝાદી અપાવી અને ઈન્દિરા અને રાજીવ ગાંધીએ દેશની એકતા માટે બલિદાન આપ્યું, તમે શું કર્યું?

આ મુદ્દે બીજેપી નેતા કિરણ રિજિજુએ કહ્યું કે, હું માની શકતો નથી કે કોંગ્રેસ અધ્યક્ષ મલ્લિકાર્જુન ખડગે આટલા નીચા ઉતરીને આવી વાંધાજનક ટિપ્પણી કરી શકે છે. તેમણે રાજકીય પક્ષના નેતા તરીકે પોતાની જવાબદારીઓ સમજવી જોઈએ. અમે દુશ્મન નથી, હરીફ છીએ. આ અરુચિકર, કમનસીબ અને બિનજરૂરી છે.

મલ્લિકાર્જુન ખડગેના નિવેદન બાદ ભાજપ સતત હુમલા કરી રહ્યું છે. આક્રમક બની ગયું છે. બીજેપી સાંસદ નિશિકાંત દુબેએ કહ્યું કે ખડગે સાહેબની પાર્ટી બધાને કૂતરા માને છે. મારા દાદા લગભગ 5 વર્ષ જેલમાં હતા અને કોંગ્રેસમાં હતા. કોંગ્રેસે આજ સુધી બધાને કુતરા સમાન ગણ્યા છે.

English summary

BJP uproar in Parliament after statement on Kharge's freedom struggle issue