આસારામ રેપ કેસ: સુપ્રિમ કોર્ટે UP સરકારને આપ્યો આ આદેશ!

આસારામ બાપુની બળાત્કાર કેસમાં 2013માં ધરપકડ કરવામાં આવી હતી. તે બાદ તે આજ દિવસ સુધી જેલમાં છે. ત્યારે સુપ્રિમ કોર્ટે આ મામલે સાક્ષીઓને સુરક્ષા આપવાનું કહ્યું છે.

Updated: Saturday, March 25, 2017, 11:55 [IST]

સુપ્રીમ કોર્ટે શુકવારે હરિયાળા અને ઉત્તર પ્રદેશની સરકારને આસારામ બાપુ બળાત્કાર કેસના સાક્ષીઓને યોગ્ય સુરક્ષા આપવાનો આદેશ કર્યો છે. જસ્ટિસ અર્જન કુમાર સિકરી અને જસ્ટિસ અશોક ભૂષણ આ અંતરિમ આદેશ પાસ કર્યો છે. અદાલતે આ આદેશ ચાર સાક્ષીઓના વકીલની યાચિકા હેઠળ જાહેર કર્યો છે. અરજકર્તાઓના વકીલે આ કેસ સાથે જોડાયેલા ચાર સાક્ષીઓની સંપૂર્ણ સુરક્ષા માંરગી છે. કારણ કે આ પહેલા આ કેસના ત્રણ સાક્ષીઓની હત્યા કરવામાં આવી છે. વધુમાં જે સાક્ષીઓની હત્યા થઇ છે તેની તપાસ પણ SIT કે CBI દ્વારા કરવામાં આવે તેવી માંગ કરવામાં આવી છે. આ રિપોર્ટ મુજબ 10 સાક્ષીઓમાંથી અત્યાર સુધીમાં 3 સાક્ષીઓની હત્યા થઇ ગઇ છે. અને 7 પર ધાતકી હુમલા કરવાનો પ્રયાસ કરવામાં આવ્યો છે.

નોંધનીય છે કે આ કેસમાં રાજસ્થાનની જોધપુર પોલીસે વર્ષ 2013માં 3 ઓગસ્ટના રોજ આસારામની ધરપકડ કરી હતી. અને તે પછીથી આજ દિવસ સુધી તે જેલમાં છે. આસારામ પર સગીર યુવતી પર યૌન શોષણનો મામલો દાખલ છે. જો કે આ મામલે આસારામ અનેક વાર જામીન પર છૂટા થવાની અરજી કરી ચૂક્યા છે પણ કોર્ટે દર વખતે તેમની આ અરજી ફગાવી દીધી છે. વધુમાં તેમનો પુત્ર નારાયણ સાંઇ પણ બળાત્કારના કેસમાં જ જેલમાં બંધ છે. અને બન્ને પર હાલ કોર્ટમાં કેસ ચાલી રહ્યા છે.